पुणे - विष्णुमय जग वैष्णवांचा धर्म

भेदाभेद भ्रम अमंगळ।।

कोणाही जिवाचा न घडो मत्सर

वर्म सर्वेश्वर पूजनाचे।।

जगद्गुरू तुकाराम महाराजांच्या अभंगातील या ओळींचा प्रत्यय आज भवानी पेठेत आला. येथील नवभारत सेवा मंडळातर्फे मुस्लीम बांधवांनी वारकऱ्यांच्या भोजनाची व्यवस्था करीत हिंदू-मुस्लिम एकोप्याचे दर्शन घडवले. पालख्यांचे सोमवारी (ता. १२) शहरात आगमन झाल्यापासूनच मंडळातर्फे वारकऱ्यांच्या सेवेला सुरुवात झाली.

सोमवारी रात्री भोजन, मंगळवारी (ता. १३) सकाळी नाश्‍ता, दुपारचे भोजन व रात्रीचे भोजन अशी सर्व सोय मंडळातर्फे करण्यात आली. त्याचप्रमाणे वारकऱ्यांसाठी आरोग्य तपासणी शिबिर पण आयोजित करण्यात आले होते. सुमारे पंधराशे वारकऱ्यांनी एकवेळच्या भोजनाचा लाभ घेतला.

याबाबत मंडळाचे रशीद शेख म्हणाले, ‘गेल्या आठ ते दहा वर्षांपासून मुस्लीम बांधवांतर्फे वारकऱ्यांची सेवा केली जाते. शहरात धार्मिक सलोख्याचे वातावरण राहावे, हिंदू-मुस्लिम एकोपा टिकून राहावा हा संदेश देण्याचा आमचा प्रयत्न आहे. वारीत सहभागी होणारे वारकरी एवढ्या मोठ्या अंतरावरून चालत येतात. यापुढेही त्यांना मोठा पल्ला पार करायचा असतो. त्यांची सेवा करणे हे आमचे कर्तव्यच आहे, अशी आमची भावना आहे.’