पुणे - एटीएम मशिनमध्ये छेडछाड करून बँक खातेदारांचे पैसे लुटणाऱ्या दोघांना भारती विद्यापीठ पोलिसांनी अटक केली आहे. त्यांच्याकडून सहा हजारांची रोकड, मोबाईल आणि एटीएममध्ये छेडछाड (टेम्परिंग) करण्यासाठी वापरलेली पट्टी असा १५ हजार रुपयांचा मुद्देमाल जप्त करण्यात आला आहे. दोघांनी एटीएम मशीनमधून पैसे काढल्याचे पोलिस तपासात कबूल केले आहे.

धर्मेंद्र श्रीशिवलाल सरोज (वय ३०) आणि सोनू कुमार जगदेव सरोज (वय २८, दोघेही रा. उत्तरप्रदेश) अशी अटक केलेल्या दोघांची नावे आहेत. पैसे काढण्यासाठी आलेल्यांना मदत करण्याच्या बहाण्याने तसेच एटीएम मशिनमध्ये छेडछाड करून पैसे काढल्याचे अनेक प्रकार शहरात घडले आहेत. या गुन्ह्यांचा तपास करताना पोलिसांची माहिती मिळाली होती. त्यानुसार ही कारवार्इ करण्यात आली.

समर्थ पोलिस ठाण्याच्या हद्दीत देखील अशाच प्रकारचा एक गुन्हा घडला आहे. त्या अनुषंगाने देखील आरोपींकडे तपास करण्यात येत आहे. सहायक पोलिस निरीक्षक अमोल रसाळ यांच्या मार्गदर्शनाखाली भारती विद्यापीठ पोलिस ठाण्याच्या पथकाने आरोपींना अटक केली.

असे काढत पैसे -

मशीनमधून ज्या ठिकाणाहून पैसे निघतात तेथे आरोपी एक पट्टी लावत होते. त्यामुळे एखाद्या ग्राहकांना एटीएममधून पैसे काढण्याचा प्रयत्न केला तर त्याच्या खात्यातून पैसे वजा होत. मात्र ते एटीएममधून बाहेर येत नसत. पैसे मशिनमध्येच अडकले आहेत, असे समजून ग्राहक एटीएममधून निघून जात.

ग्राहक निघून गेल्यानंतर आरोपी ते पैसे काढून घेत होते. भारती विद्यापीठ परिसरातील एका बँकेच्या एटीएम सेंटरमध्ये हा प्रकार घडला होता. त्या अनुषंगाने पोलिस तपास करीत होती. त्या गुन्ह्यात पोलिसांनी धर्मेंद्र सरोज आणि सोनू कुमार सरोज यांची माहिती मिळाली होती. त्यानुसार दोघांना अटक करण्यात आली.