फिंगरप्रिंट मिळू नये म्हणून
चोरट्यांनी जाळले एटीएम

मशीन चोरणाऱ्या चोरट्यांचा नांदेड पोलिसही घेत आहेत शोध

सकाळ वृत्तसेवा
सोलापूर, ता. २० : विडी घरकूल परिसरातील सग्गम नगरातून शनिवारी (ता. १६) मध्यरात्री एटीएम मशीनच चोरून नेले. त्यात एक लाख ७९ हजार रुपये होते. गाडीत घालून नेलेल्या मशीनमधील पैसे काढून चोरट्यांनी तळेहिप्परगाजवळील शेतात ते फेकून दिले. मात्र, तोडफोड करून चोरट्यांनी मशीन जाळून टाकले. जेणेकरून पोलिसांना फिंगरप्रिंट मिळू नयेत, याची खबरदारी त्यांनी घेतल्याचे पोलिस सांगतात.
एटीएम मशीन चोरणारे चोरटे शेळगी, दहिटणे आडमार्गाने मार्डीच्या दिशेने गेले. त्यानंतर ते पुढे कोठून, कसे मार्गस्थ झाले, याचा शोध लागलेला नाही. तत्पूर्वी, त्या एटीएम केंद्रावरील सीसीटीव्ही कॅमेऱ्याचा डीव्हीआरदेखील त्यांनी चोरून नेला. चोरट्यांच्या मार्गाचा शोध घेण्यासाठी शहर गुन्हे शाखा व एमआयडीसी पोलिसांच्या चार पथकांनी मोहोळ, उत्तर सोलापूर, दक्षिण सोलापूर, माढा, बार्शी या तालुक्यांमधील सुमारे ५० गावांमध्ये चौकशी केली. पण, चोरट्यांच्या वाहनाचा पत्ता लागलेला नाही. या चोरट्यांनी पोलिसांना आपण सहजासहजी सापडणार नाही, याची पुरेपूर खबरदारी घेतली आहे. त्यामुळेच पोलिसांना अजूनही चोरट्यांचा थांगपत्ता लागलेला नाही.
दरम्यान, सोलापूर शहरात ज्या पद्धतीने चोरट्यांनी एटीएम मशीन चोरून नेले, अशीच चोरी २४ फेब्रुवारी २०२६ रोजी नांदेडमध्येही झाली होती. नांदेड पोलिसांनाही त्या चोरट्यांचा शोध लागलेला नाही. परंतु, चोरटे निश्चितपणे सापडतील, असा विश्वास पोलिस अधिकाऱ्यांना आहे.