Chakan News : येथील औद्योगिक वसाहतीतील महाळुंगे ता. खेड गावच्या हद्दीतील एका कंपनीत कामगारांची मीटिंग चालू असताना कंपनीतील एकाने एकावर चाकूने हल्ला केला त्यावेळी कंपनीतील दुसरी व्यक्ती आरोपी करत असलेला हल्ला रोखण्यासाठी पुढे आली . या हल्ल्यात कंपनीतील दोघे जण जखमी झाले आहेत.

या हल्ल्याप्रकरणी आरोपी अजय अबधाशरण दोहरे, सध्या रा. डोंगरवस्ती, निघोजे,ता. खेड, मूळ रा. बहादुरपूर ता. जि.दातीया, मध्यप्रदेश याला अटक करण्यात आली आहे.अशी माहिती महाळुंगे पोलीस ठाण्याचे वरिष्ठ पोलीस निरीक्षक नितीन गीते यांनी दिली.

पोलिसांनी दिलेल्या माहीतीनुसार, "हा प्रकार ता.21 ला सकाळी आठच्या सुमारास सुप्रजित प्रा. लि. या कंपनीत घडला.पोलिसांत फिर्याद सचिन चव्हाण (वय -20 वर्ष, रा. महाळुंगे )यांनी दिली आहे.फिर्यादी चव्हाण हे नेहमीप्रमाणे कामावर आले त्यावेळी सौरभ दुपडे व आरोपी हे देखील कामावर आलेले होते.

त्यानंतर काही वेळात कंपनीच्या क्वालिटी मीटिंग एरियामध्ये क्वालिटी विभागातील कामगारांची मीटिंग चालू असताना अचानक आरोपी दोहरे याने त्याच्या खिशातून चाकू काढला व " कल मुझे गालिया क्यू दी" असे म्हणत चाकू घेऊन मारण्यासाठी धावला.

यावेळी आरोपीने सौरभ दुपडे याच्या गालावर,डाव्या हाताचे दंडावर चाकूने मारून त्याला जखमी केली त्यावेळी फिर्यादी चव्हाण हे दोघांच्या मध्ये पडले. त्यावेळी आरोपीने चाकूने फिर्यादी चव्हाण यांच्या हनुवटीवर व दोन्ही हातावर वार करून त्यांना जखमी केले.

आरोपीपासून वाचण्यासाठी फिर्यादी हे पळत जात असताना आरोपीने फिर्यादी यांच्या पाठीवर देखील चाकूने वार करून त्यांना जखमी केले आहे.असे फिर्यादित म्हंटले आहे.