पुणे : भारतीय वाद्यांच्या आवाजाचे नवीन हॉर्न वाहनांमध्ये बसविण्याबाबत केंद्रीय मंत्री नितीन गडकरी यांनी केलेल्या घोषणेवर श्रवण तज्ज्ञ डॉ. कल्याणी मांडके यांनी आक्षेप घेतला आहे. याबाबत त्यांनी केंद्रीय रस्ते वाहतूक आणि महामार्ग मंत्रालयाला कायदेशीर नोटीस पाठवली आहे.

गडकरी यांनी एका कार्यक्रमात वाहनांच्या हॉर्नच्या आवाजासंबंधी नियमांमध्ये बदल करणार असल्याची घोषणा केली होती. या संदर्भात केंद्रीय रस्ते वाहतूक आणि महामार्ग मंत्रालय मोटार वाहन उत्पादक कंपन्यांना हॉर्नच्या संगीतमय आवाजाबद्दल निर्देश देण्यात येणार आहेत. मात्र, कुठलेही नवीन धोरण, कल्पना विज्ञानाधारित असावी, अशी भूमिका घेत डॉ. कल्याणी मांडके यांनी ॲड. असीम सरोदे, ॲड. अजित देशपांडे, ॲड. अक्षय देसाई यांच्यामार्फत संबंधित मंत्रालयाला नोटीस पाठवली आहे.

आवाजासंबंधीची ही कल्पना नावीन्यपूर्ण आणि रंजक वाटत असली तरी त्याबद्दल सर्वकष विचार करण्याची आवश्यकता असल्याचे त्यात नमूद केले आहे. हॉर्न हा रस्त्यावरील इतर वाहने, पायी चालणारी माणसे यांना सावध करण्यासाठी आणि संभाव्य अपघात टाळण्यासाठी असतो. हॉर्नचा आवाज हा ऐकण्याचा संकेत असून, ऐकण्याची कमी-अधिक क्षमता असणाऱ्या सर्वांनाच ऐकू येईल अशा वारंवारितेच्या ध्वनिलहरींमध्ये असतो. तसेच त्याची तीव्रता देखील विशिष्ट पातळीची असायला हवी, असे नोटीसमध्ये नमूद केले आहे.