पुणे - महापालिकेच्या मराठी भाषा समितीतर्फे विविध साहित्यकृतींना दिल्या जाणाऱ्या पुरस्कारांची घोषणा महापौर मुक्ता टिळक यांनी केली आहे. ‘सकाळ प्रकाशन’च्या ‘निदान’ या पुस्तकासाठी डॉ. सुरेश शिंदे आणि ‘३० सामर्थ्यशाली स्त्रिया’ या अनुवादित पुस्तकासाठी वर्षा गजेंद्रगडकर यांना हा पुरस्कार मिळाला आहे.

२०१५ आणि २०१६ या दोन वर्षांसाठीच्या १७ पुरस्कारांची घोषणा महापौरांनी केली. पुरस्कारांसाठी मराठी अनुवाद, बालसाहित्य, कथा, कविता, कादंबरी, आर्थिकविषयक लेख, विज्ञान लेख, नवोदित साहित्यिक, मुद्रितशोधक अशा विविध विभागांमध्ये १०६ साहित्यकृती प्राप्त झाल्या होत्या. महापौरांच्या अध्यक्षतेखाली भाषा समितीच्या बैठकीत १७ साहित्यकृतींना पुरस्कार देण्याचा निर्णय घेण्यात आला. याअंतर्गत नवोदित साहित्यिकांचे पहिले पुस्तक या विभागासाठी डॉ. सुरेश शिंदे यांना, तसेच अनुवादित पुस्तक विभागात लेखिका व अनुवादक वर्षा गजेंद्रगडकर यांना पुरस्कार जाहीर करण्यात आला आहे. 

पुरस्कारार्थींमध्ये प्रभाकर करंदीकर, डॉ. लीला दीक्षित, मंदाकिनी खांडगे, डॉ. स्नेहसुधा कुलकर्णी, राजीव बर्वे, विलास चाफेकर, सुजाता फडके, मंजूषा आमडेकर, अनिल दांडेकर, ॲड. आनंद गवळी, डॉ. हणमंत सरदेसाई, मनीषा बाठे आणि अजित आपटे यांचा समावेश आहे. रोख २५ हजार आणि सन्मानचिन्ह असे या पुरस्काराचे  स्वरूप आहे. 

या पुरस्काराचे वितरण, तसेच मराठी भाषा गौरव दिनानिमित्त घेण्यात आलेल्या पत्रलेखन स्पर्धेतील विजेत्यांना येत्या सोमवारी (ता. ९) सकाळी साडेअकराला महापालिका भवनातील श्री छत्रपती शिवाजी महाराज सभागृह येथे ज्येष्ठ साहित्यिक भारत सासणे आणि वीणा देव यांच्या हस्ते गौरविण्यात येणार आहे.