बारामती, ता. १७ : शहरातील तिरंगा चौकात नाकाबंदी दरम्यान पोलिसांना धक्काबुक्की व सुरक्षा रक्षकास मारहाण करून अज्ञात दुचाकीस्वार पसार झाला. सरकारी कामात अडथळा आणल्याप्रकरणी बारामती शहर पोलिस ठाण्यात या संशयिताविरोधात गुन्हा दाखल करण्यात आला आहे. जिल्हा वाहतूक शाखेचे सहाय्यक पोलिस निरीक्षक सुभाष काळे यांनी याप्रकरणी फिर्याद दिली आहे.
मंगळवारी (ता. १२) सायंकाळी तिरंगा चौक येथे वाहतूक शाखा व शहर पोलिसांकडून संयुक्त नाकाबंदी सुरू होती. यावेळी विना नंबर प्लेटची काळी युनिकॉर्न दुचाकी संशयास्पदरीत्या येताना दिसली. पोलिसांनी वाहन अडवून ई-चलानद्वारे कारवाई सुरू केली असता, चालकाने दुचाकी पळवण्याचा प्रयत्न केला. पुनावाला गार्डनसमोर ताबा सुटल्याने तो खाली पडला. पोलिस व सुरक्षा रक्षक केशव मोरे यांनी त्याला पकडण्याचा प्रयत्न केला असता, त्याने शिवीगाळ व धक्काबुक्की करत पलायन केले. पोलिसांनी त्याची दुचाकी (एमएच ४२ बीव्ही ८८०५) जप्त केली असून, पोलिस अधिक तपास करत आहेत.