पुणे - ‘बॅण्ड म्हटला, की त्याच्याकडं विशिष्ट पद्धतीनं पाहिलं जातं. मात्र, माझा बँड पूर्णतः वेगळा आहे. माझ्या काही गाजलेल्या, काही आतापर्यंत न ऐकलेल्या, सत्तरच्या दशकातील जुन्या रचनांचा बॅण्डमध्ये समावेश आहे. त्यामुळं तरुणांपासून कुटुंबातील सर्वांना तो भावतो...’ अभिनेता, लेखक, पीयूष मिश्रा सांगत होते.

मिश्रा यांच्या ‘बल्लिमारन’ या बॅण्डचा पुण्यात शनिवार (ता. ४ जून) कार्यक्रम होत आहे. या पार्श्वभूमीवर त्यांनी ‘सकाळ’शी संवाद साधला. ते म्हणाले, ‘‘मला गाण्यांची लहानपणापासूनच आवड आहे. कविता लिहिण्याचाही छंद लहानपणापासूनच लागला. आठवीत असताना मी पहिली कविता लिहिली होती. माझी गाण्याची आवड लक्षात घेता हितेश सोनीक या मित्रानं ‘तू स्वतःचा बँड का सुरू करत नाहीस,’ अशी विचारणा केली. त्यानंतर गिटारवादक निशांत आगरवाल या मित्रानं बॅण्डची संकल्पना माझ्या डोक्यात घातली. त्यानं मला दिल्लीतून मुंबईला बोलावून घेतलं आणि ‘बल्लिमारन’चा प्रवास सुरू झाला. जयंत पटनाईक यांनी वाद्यवृंद रचनेची जबाबदारी घेतली.’’

बॅण्डच्या वैशिष्ट्यांबद्दल म्हणाले, ‘‘यात मी रचलेली गाणी अधिक आहेत. त्याशिवाय सत्तरच्या दशकातील काही गाण्यांचा समावेश केलेला आहे. बॅण्डमध्ये चित्रपटातीलच गाणीच पाहिजेत असं नाही. त्यामुळं माझ्या बँडमध्ये चित्रपटातील एकही गाणं नाही. मात्र, सर्वांना भावतील अशा रचना आहेत. गाण्यातील शब्द महत्त्वाचे असतात, याचा जास्त विचार केला आहे. कोणतंही गाणं हायपीच नाही. त्याबरोबर गाण्यांच्या धूनवरही लक्ष दिलेलं आहे. युवकांबरोबर कुटुंबातील सर्वांना भावतील अशा गाण्यांचा या बॅण्डमध्ये समावेश केलेला आहे, हे जास्त वैशिष्ठ्यपूर्ण आहे. या बॅण्डमध्ये गाण्यांप्रमाणे वाद्यवृदांवरही भर दिलेला आहे. गिटार, ड्रमर, व्हॉयोलिन, सॅक्सोफोन यांचा योग्य मेळ बसविला आहे.’’

या कार्यक्रमाची तिकीट बुक करण्यासाठी त्वरा करा.