बारामती, ता. १७ : सावळ (ता. बारामती) येथील वीरकर वस्ती परिसरात महावितरणच्या रोहित्रावरील ३० हजार रुपये किमतीच्या ॲल्युमिनियम तारा चोरीला गेल्याची घटना उघडकीस आली आहे. याप्रकरणी बारामती तालुका पोलिस ठाण्यात चोरट्याविरुद्ध गुन्हा दाखल करण्यात आला आहे. याबाबत महावितरणचे वरिष्ठ तंत्रज्ञ सतीश पोपट गडे (रा. काटेवाडी) यांनी फिर्याद दिली आहे. गुरुवारी (ता. १४) येथील १०० केव्हीए क्षमतेच्या रोहित्रावरील (क्र. ०४९१६४७) ११ गाळ्यांमधील अंदाजे २६४० मीटर लांबीच्या तारा चोरीला गेल्याचे निदर्शनास आले. फिर्यादी व लाइनमन गणेश हिंगसे यांनी घटनास्थळाची पाहणी केल्यानंतर ही तक्रार दाखल केली.