बारामती, ता. २४ : प्रवासाचे तिकीट सांगवीपर्यंतच असल्याने पुढील प्रवासासाठी नियमानुसार तिकीट काढण्यास सांगितल्याचा राग मनात धरून तीन तरुणांनी एसटी बस अडवून वाहकाला मारहाण केल्याची घटना बारामतीतील तुपे पेट्रोलपंपाजवळ रविवारी (ता. २३) सायंकाळी घडली. याप्रकरणी बारामती शहर पोलिस ठाण्यात तीन अज्ञात व्यक्तींविरुद्ध गुन्हा दाखल करण्यात आला आहे.
याबाबत एसटी महामंडळाचे वाहक रामचंद्र दादा जाधव यांनी फिर्याद दिली आहे. जाधव हे बस (क्र. एमएच १४ बीटी ४४२५) वर बारामती-फलटण मार्गावर वाहक म्हणून कर्तव्य बजावत होते. फलटणहून बारामतीकडे येत असताना सांगवी येथे बसमधील काही प्रवाशांचे तिकीट सांगवीपर्यंतच असल्याचे त्यांच्या निदर्शनास आले. त्यानंतर पुढील प्रवासासाठी नियमानुसार तिकीट काढण्यास सांगितल्याने संबंधित व्यक्तींनी नाराजी व्यक्त केल्याचे फिर्यादीत म्हटले आहे. त्यानंतर त्याच दिवशी सायंकाळी तुपे पेट्रोलपंपाजवळ तीन अज्ञात व्यक्ती दुचाकीवरून आल्या. त्यांनी दुचाकी एसटी बससमोर आडवी लावून बस थांबवून जाधव यांना मारहाण केल्याचे फिर्यादीत नमूद आहे. बसचालक व इतर प्रवासी मदतीसाठी पुढे येत असल्याचे पाहून तिन्ही आरोपी घटनास्थळावरून पसार झाले. मात्र, त्यांची दुचाकी (क्र.एमएच ११ सीपी ७३९९) घटनास्थळीच राहिल्याने ती पोलिसांनी ताब्यात घेतली आहे.