बारामती, ता. १७ : शहरातील इंगळेवस्ती येथे पोलिसांनी छापा टाकून महाराष्ट्रात प्रतिबंधित असलेला गुटखा, पानमसाला व सुगंधित तंबाखूचा सुमारे एक लाखांचा मुद्देमाल जप्त केला. या प्रकरणी सागर मधुकर साळुंखे (वय ३३, रा. मदनवाडी, भिगवण, ता. इंदापूर) याच्याविरुद्ध बारामती पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, सागर साळुंखे यास ताब्यात घेऊन तपासणी केली असता त्याच्याकडून विविध प्रकारचा प्रतिबंधित गुटखा व तंबाखूजन्य पदार्थ असा मुद्देमाल जप्त करण्यात आला. ही कारवाई उपविभागीय पोलिस अधिकारी चैतन्य कदम यांच्या आदेशाने करण्यात आली. अन्न सुरक्षा अधिकारी संदीप दिगंबरराव शिंदे यांनी फिर्याद दिली.