बारामती - गेल्या काही महिन्यात बारामती पंचक्रोशीच्या अर्थकारणाला वेगळी दिशा प्राप्त झाली असून येत्या कालावधीतही बारामती पंचक्रोशीतील अर्थकारणामध्ये घसघशीत वाढच होणार आहे. या अर्थकारण बदलाचे कारण म्हणजे भूसंपादनापोटी मिळालेली रक्कम.

विकासाच्या विविध प्रकल्पांनी वेग पकडल्यानंतर भूसंपादनाचीही कामे वेगाने झाली तर काही ठिकाणी अजूनही सुरु आहेत. या भूसंपादनापोटी बारामती, इंदापूर व दौंड या तीन तालुक्यात मिळून आतापर्यंत 1093 कोटी 29 लाख रुपयांचे वाटप शासनाकडून लाभार्थ्यांना झालेले आहे.

पाटस ते बारामती या संत तुकाराम महाराज पालखी मार्गाच्या भूसंपादनापोटी आतापर्यंत 424 कोटी, कण्हेरी ते इंदापूर या टप्प्यासाठी 314 कोटी रुपये तर वडापुरी ते सराटी या मार्गासाठी 168 कोटी रुपयांचे वाटप करण्यात आले आहे. या तिन्ही टप्प्यांसाठी 1236 कोटी रुपये भूसंपादनासाठी मिळणार असून त्या पैकी 907 कोटी रुपयांचे वाटप प्रत्यक्षात झालेले आहे.

बारामती ते फलटण रेल्वे मार्गाच्या भूसंपादनापोटी आतापर्यंत 186 कोटी रुपयांचे वाटप झालेले असून, अजून 50 कोटी रुपये महसूल विभागाकडे शिल्लक आहेत. रेल्वे भूसंपादन प्रक्रीया आगामी सहा महिन्यात पूर्ण करण्याच्या दृष्टीने जिल्हाधिकारी डॉ. राजेश देशमुख व उपविभागीय अधिकारी दादासाहेब कांबळे यांचा प्रयत्न असून त्या दृष्टीने आता सक्तीने भूसंपादनाची प्रक्रीया सुरु झाली आहे. 186 हेक्टरपैकी 134 हेक्टरचे भूसंपादन पूर्ण झालेले आहे.

दरम्यान उंडवडी ते बारामती या राष्ट्रीय महामार्ग क्रमांक एनएच-160 या मार्गाच्या भूसंपादनाची प्रक्रीया सुरु झाली असून यातील भूसंपादनातूही भरीव रक्कम बारामती तालुक्यातील जमीनमालकांना प्राप्त होणार आहे.

बारामती पंचक्रोशीत भूसंपादनापोटी आलेल्या रकमेतून अनेकांनी शेत जमीन, शहरालगत अकृषक जमीन खरेदी, सदनिका, व्यापारी गाळे, सोने खरेदीसह वाहन खरेदी मोठया प्रमाणावर केली आहे. या मुळे बारामतीच्या अर्थकारणाला एक वेगळी गती मिळाली आहे. अजूनही बारामतीत काही कोटी रुपयांची रक्कम भूसंपादनातून येणार असल्याने त्याचा फायदा अर्थकारण सुस्थितीत येण्यास होणार आहे.