पुणे - बारामती लोकसभा मतदारसंघातील वारजे परिसरात मतदान संपल्यानंतर तिघांनी पिस्तुलातून जमिनीवर गोळीबार करून दहशत पसरविण्याचा प्रयत्न केला. ही घटना मंगळवारी (ता. ७) रात्री रामनगरमधील शक्ती चौकात घडली. या प्रकरणी दोन अल्पवयीन मुलांना ताब्यात घेतले आहे. तर, अन्य एकजण अद्याप फरार आहे.

बारामती लोकसभा मतदारसंघात वारजे परिसरातील काही भाग येतो. मंगळवारी मतदान शांततेत पार पडले. परंतु वारजे भागातील रामनगर परिसरात दुचाकीवर आलेल्या तिघांनी पिस्तुलातून गोळीबार केला. या घटनेत कोणी जखमी झरले नाही. त्यानंतर आरोपी कात्रजच्या दिशेने पसार झाले. ही माहिती पोलिस नियंत्रण कक्षाला रात्री अकरा वाजण्याच्या सुमारास मिळाली.

याबाबत माहिती मिळताच परिमंडळ तीनचे पोलिस उपायुक्त संभाजी कदम, वारजे पोलिस ठाण्याचे वरिष्ठ निरीक्षक मनोज शेडगे घटनास्थळी दाखल झाले. आरोपींनी परिसरात दहशत पसरविण्यासाठी जमिनीवर गोळीबार केला. या प्रकरणी दोन अल्पवयीन मुलांना ताब्यात घेतल्याचे माहिती पोलिस उपायुक्त संभाजी कदम यांनी सांगितले.