बारामती : शहरातील माळावरच्या देवी जवळ निरा डावा कालव्यामध्ये गणेश विसर्जनाच्या वेळेस वाहून जाणाऱ्या आठ युवकांचे बारामती नगर परिषद अग्नीशमन विभागाचे फायरमन प्रदिप लालबिगे यांनी प्राण वाचविले. तीनहत्ती चौका नजीक असलेल्या कालव्यावरील घाटाजवळ तरूण वाहून जात असताना फायरमन मोहन शिंदे यांनी धाडसाने त्या तरूणाचा जीव वाचवला.

बारामती नगर परिषदेचे मुख्याधिकारी महेश रोकडे तसेच अग्निशमन अधिकारी पद्मनाथ कुल्लरवार यांनी विसर्जनाच्या वेळेस नीरा डावा कालव्यामध्ये लोक वाहून जातील ही शक्यता लक्षात घेऊन जीव रक्षकांची नियुक्ती केली होती. दरवर्षी गणेश विसर्जनाच्या वेळेस नीरा डावा कालव्यामध्ये अनेक जण पाण्यामध्ये घसरून पडतात.

त्यामुळे कोणतीही जीवितहानी होऊ नये या दृष्टिकोनातून नगरपालिकेने यंदा चोख उपाययोजना केली होती. नगरपालिका अग्निशमन दलाचे प्रदीप लालबिगे व मोहन लालबिगे यांनी नीरा डावा कालव्यात वाहून जाणाऱ्या जवळपास नऊ युवकांचे प्राण वाचवून मोठी कामगिरी केली आहे.