बारामती - शासनाच्या वतीने आयोजित करण्यात आलेल्या एक तारीख एक तास स्वच्छता अभियान या उपक्रमांतर्गत राज्याचे उपमुख्यमंत्री अजित पवार व सुनेत्रा पवार यांनी बारामतीत रविवारी स्वच्छता अभियानात सक्रिय सहभाग नोंदविला.

अजित पवार यांनी रविवारी ( ता.1) शहरात स्वतः स्वच्छता अभियानात अनेक ठिकाणी कचरा उचलून खोरे हातात घेऊन गवत देखील स्वच्छ केले. एन्व्हायरमेंटल फोरम ऑफ इंडियाच्या वतीने सुनेत्रा पवार यांनी देखील स्वच्छता अभियानामध्ये सक्रिय सहभाग नोंदवला. अजित पवार यांनी यावेळेस विद्यार्थ्यांना स्वच्छतेची शपथ दिली.

विविध शाळा व महाविद्यालयातील विद्यार्थ्यांसह समाजाच्या अनेक स्तरातील नागरिकांनी देखील उत्साहाने सहभाग नोंदवित एक तास स्वच्छता अभियानासाठी देऊ केला.

स्वच्छता पंधरवड्या निमित्त देशभरात आज स्वच्छतेसाठी एक तास हे अभियान राबविण्यात येत आहे. त्या अंतर्गत बारामतीत देखील विविध उपक्रमांचे आयोजन बारामती नगरपालिकेच्या वतीने करण्यात आले होते. उपमुख्यमंत्री अजित पवार, सुनेत्रा पवार तसेच राष्ट्रवादी काँग्रेस पक्षासह विविध संस्था, संघटना तसेच शाळा, महाविद्यालयांचे विद्यार्थी, प्राध्यापक, शिक्षक व प्रतिनिधी यांनी या अभियानात सहभाग नोंदवला.