बारामती : शहरात रविवारी (ता.3) झालेल्या ढगफुटी सदृश्य पावसानंतर शहरातील अनेक भागात गुडघाभर पाण्याची तळी साचली होती. या पाण्यातून मार्गक्रमण करताना बारामतीकरांची मोठी कसरत झाली. या पाण्यामध्ये काही दुचाकी वाहने बंद पडली, तर चार चाकी वाहनांच्या इंजिनमध्ये देखील पाणी गेल्याच्या घटना घडल्या.

दरवर्षी पावसाळ्यामध्ये बारामती शहरातील विविध रस्त्यांवर पाण्याची तळी साठतात, मात्र पावसाचे पाणी वाहून जाण्यासाठी कोणतीही उपाययोजना केली जात नाही. मोठा पाऊस पडल्यानंतर शहरातील काही ठराविक ठिकाणी पाणी साचून राहते. या पाण्याचा निचरा लवकर होत नाही, त्यामुळे या पाण्यातून वाट काढताना पदाचारी व दुचाकी चालकांची मोठी कसरत होते.

रविवारी देखील दुपारी चार ते साडेपाच या काळात झालेल्या पावसानंतर भिगवण रस्त्यावरील अनेक ठिकाणी पाण्याची तळी साचली होती. श्रीराम नगर चौक तसेच दत्त बेकरी नजीक गुडघाभर पाणी साचून राहिले होते. कोर्ट कॉर्नर तसेच पंचायत समिती समोरील काही भागात देखील पाण्याची तळी साचली होती. शहरात अनेक भागात असेच पाणी रस्त्यावर साठवून राहत आहे. या संदर्भात नगरपालिकेने या ठिकाणी पाण्याचा निचरा होण्यासाठी व्यवस्था करावी अशी बारामतीकरांची मागणी आहे.