बारामती : संततधार पावसाने बारामतीचे जनजीवन आज पार विस्कळीत झाले. सकाळपासूनच पावसाची संततधार सुरु असल्याने छत्री व रेनकोटशिवाय बाहेर पडलेल्या बारामतीकरांना भिजण्याशिवाय पर्यायच राहिला नाही.

प्रारंभी पावसाची भुरभुर होती, मात्र नंतर पावसाने चांगलाच जोर धरला. नवरात्राच्या पहिल्या माळेचे स्वागत आज वरुणराजाने केले. सोमवारचा दिवस असल्याने सकाळपासूनच लोकांची कामासाठी बाहेर पडण्याची लगबग सुरु होती, मात्र पावसाने हजेरी लावल्यामुळे काही वेळातच रस्त्यांवरची गर्दी रोडावली. पितृपंधरवड्यामुळे गेले काही दिवस बाजारपेठेतही काहीशी हालचाल मंदावली होती, आजपासून खरेदीला प्रारंभ होईल अशी व्यापा-यांची अपेक्षा होती, मात्र संततधार पावसाने आजचा दिवसही थंड गेला.

वाहतूकीच्या कोंडीने बारामतीकर त्रस्त.....

दरम्यान पावसाची संततधार व प्रशासकीय भवन चौकापासून ते कारभारी सर्कलपर्यंत ट्रक व अवजड वाहनांच्या वाहतूकीसह बसेसच्या वाहतूकीमुळे आज वाहतूकीची अनेकदा कोंडी झाली. पावसामुळे पोलिसही रस्त्यावर नसल्याने पावसात दुचाकीस्वारांचे हाल झाले. वास्तविक बसस्थानक कसब्यात हलविल्यानंतर वाहतूकीचे नियोजन करण्यासाठी या परिसरात कायमस्वरुपी वाहतूक पोलिसांची आवश्यकता आहे. वाहतूकीचे योग्य समन्वयन होत नसल्याने बारामतीकरांना कोंडीत वेळ व्यतित करावा लागत आहे.

शहरातील चौकात अनेकदा वाहतूक कोंडी होते, वाहतूक पोलिसांची उपस्थिती गरजेची असून त्यांच्याकडून वाहतूकीचे समन्वयन व्हावे अशी अपेक्षा नागरिक व्यक्त करीत आहेत.गेल्या काही महिन्यांपासून सुरु असलेल्या पावसाने बारामतीकरही आता त्रासून गेले असून हा पाऊस लवकर थांबावा अशी लोकांची प्रार्थना आहे.