वडगाव निंबाळकर : मुढाळे ता. बारामती येथील जिल्हा परिषद शाळेतील कॉम्प्युटर आणि शालेय पोषण आहाराची भांडी चोरणारे चोरटे गावातलेच निघाले. दोन महिन्यापुर्वी मंगळवार ता. १४ सप्टेंबर २०२१ शाळेचे कुलूप तोडून चोरट्यांनी शाळेतील कॉम्प्युटर आणि शालेय पोषण आहाराची भांडी चोरून नेली होती याबाबत वडगाव निंबाळकर पोलिस ठाण्यामध्ये घरफोडीचा गुन्हा नोंदवण्यात आला होता.

सदर गुन्ह्याचा तपास करीत असताना बारामती स्थानिक गुन्हे अन्वेषण विभागाच्या पथकाला मिळालेल्या माहितीनुसार येथील राजेंद्र जाधव व त्याचे इतर साथीदारांनी मिळून चोरी केली आहे. जाधव यास ताब्यात घेऊन घरफोडी बाबत विचारपूस केली असता गुन्हा उघडकीस आला. पोलिसांनी राजेंद्र मारुती जाधव, लक्ष्मण मल्हारी सकाटे, राहुल वसंत सकाटे सर्व रा. मुढाळे ता. बारामती यांना ताब्यात घेतले.

त्यांच्याकडुन चोरलेला ऐवज ताब्यात घेउन गजाआड केले. सदरील कारवाई पोलिस अधिक्षक अभिनव देशमुख, अप्पर पोलिस अधिक्षक मिलिंद मोहिते, उपविभागीय पोलीस अधिकारी गणेश इंगळे यांचे मार्गदर्शनाखाली स्थानिक गुन्हे शाखेचे वरिष्ठ पोलिस निरीक्षक अशोक शेळके सहाय्यक पोलिस निरीक्षक संदिप येळे, रविराज कोकरे, आसिफ शेख, अभिजित एकशिंगे, स्वप्निल अहिवळे यांनी केली आहे.