बारामती - तालुक्यातील पणदरे येथील विपुल अभय शहा याला 'सोलराईज' पुरस्कार जाहीर झाला असून अमेरिकेत 23 ते 25 मे दरम्यान होणा-या तीन दिवसीय मेळाव्यात त्याला तो प्रदान केला जाणार आहे. दरम्यान लॉसएंजलिस व कॅलिफोर्निया येथेही त्याला आमंत्रित करण्यात आले आहे.

अमेरिकेतील एम. आय. टी. विद्यापीठातून स्थापित झालेल्या 'प्रेजेंसिंग इन्स्टिट्यूट' तसेच 'अशोका चेंजमेकर' या संस्थेने जगभरातून 80 लोकांची निवड या पुरस्कारासाठी केली आहे.

जगभरातील निरनिराळ्या धार्मिक तसेच आध्यात्मिक तत्वांचा आधार घेऊन सामाजिक परिवर्तन कसे साधता येईल हा या मेळाव्याचा प्रमुख विषय असणार आहे.

या पुरस्कारासाठी निवड करताना विपुल यांची शिक्षण तसेच मानसिक आरोग्य क्षेत्रातील कामगिरी, त्यांचा विपश्यना ध्यान व बुद्ध शिकवणीतून विकसित झालेले मनोविज्ञान, गांधीनीती तसेच योगाभ्यास व जैन धार्मिक वारसा या सर्वांचा विचार घेण्यात आला.

आधुनिक युगामध्ये मानवजातीला भेडसावत असलेल्या सामाजिक, राजकीय तसेच पर्यावरणीय प्रश्नांची उत्तरे प्राचीन भारतीय संस्कृती व तत्वज्ञानातून भेटू शकतात असा विश्वास विपुल यांना वाटतो. हा पुरस्कार म्हणजे भारतीय तत्वज्ञान व संस्कृती विषयी पाश्चिमात्य जगामध्ये वाढत चाललेल्या आदर भावनेचे प्रतीक आहे असेही त्यांनी व्यक्त केले.

'अध्यात्म आणि युवा विकास' या विषयावरील त्यांचा अनुभव व विचार मांडण्यासाठी विपुल यांना या चर्चासत्रामध्ये आमंत्रित केले आहे. विपुल यांनी यापूर्वी 'टीच फॉर इंडिया' तसेच जे. कृष्णमूर्ती यांचा शाळांमध्ये काम केले आहे.

या पुरस्कार कार्यक्रमानंतर विपुल हे 'न्यू मेक्सिको' येथील एका युवा शिबिरामध्ये सामील होणार असून, ध्यान व बुद्धिविकास (neuroscience) यावर रिसर्च करणाऱ्या काही अमेरिकन वैज्ञनिकांचीदेखील भेट ते घेणार आहेत. स्वातंत्र्य सैनिक आजोबा व त्यांनी लहान वयात केलेल्या धर्मसंस्कारांमुळे हा पुरस्कार मिळाल्याचे विपुल यांनी नमूद केले.