देहू - आषाढी वारीसाठी संत तुकाराम महाराज पालखी सोहळ्याने 12 जूनला देहूतून प्रस्थान ठेवले. कोरोनाच्या पार्श्वभूमीवर आणि शासनाच्या आदेशानुसार यंदाची पायी वारी रद्द करण्यात आली. प्रस्थान सोहळ्यानंतर संत तुकाराम महाराजांच्या पादूका देहूतील देऊळवाड्यातील भजनी मंडपात ठेवण्यात आल्या. परंपरेनुसार संत तुकाराम महाराज संस्थानच्या वतीने वारीतील दैनंदिन महापुजा, किर्तन, जागर करण्यात येत आहे.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

शुक्रवारी (ता. 26) पालखी सोहळ्याचा 15 वा दिवस आहे. या दिवशी वारीच्या वाटेवर पालखी सोहळा पुणे जिल्ह्यातील सराटी गावातून सोलापूर जिल्ह्यात प्रवेश करते. त्यापूर्वी संत तुकाराम महाराजांच्या पादूकांना निरा नदीत स्नान करण्यात येते. यंदा मात्र देहूतच हा कार्यक्रम संपन्न झाला. यंदा संस्थानच्या विश्वस्त आणि पालखी सोहळा प्रमुखांनी संत तुकाराम महाराजांच्या पादूकांना निरा स्नान देहूतील इंद्रायणी नदीतच केले. गुरुवारी निरा नदीतील पाणी संस्थानने आणले. त्यानंतर आज इंद्रायणी नदीत पादूकांना दोन्ही नदीच्या पाण्याने अभिषेक करण्यात आला. तसेच आरती करण्यात आली. यावेळी पुंडलिकावर देच्या गजराने इंद्रायणीचा काठ दुमदुमुन गेला. पालखी सोहळा प्रमुख विशाल महाराज मोरे, संतोष महाराज मोरे, विश्वस्त अजित महाराज मोरे, माजी विश्वस्त विश्वजित मोरे, पुंडलिक महाराज मोरे, पुजारी धनंजय मोरे व इतर उपस्थित होते.