हिंजवडी - भाजपतर्फे मतदार स्लिपांचे वाटप करणाऱ्या एका डॉक्‍टरला मारहाण केल्याप्रकरणी हिंजवडीचे माजी सरपंच सागर दत्तात्रय साखरे याला अटक करण्यात आली. मंगळवारी (ता. २३) त्याला न्यायालयासमोर हजर केले असता मतदानासाठी त्याची जामिनावर सुटका करण्यात आली. याप्रकरणी डॉ. आकाश राठोड (वय २६, रा. गोखलेनगर, पुणे) यांनी फिर्याद दिली आहे. दरम्यान, मंगळवारी मतदानासाठी हिंजवडीत मोठा पोलिस बंदोबस्त तैनात करण्यात आला होता.

साखरे याला पुढील पंधरा दिवस दररोज पोलिस ठाण्यात हजेरी लावण्याचे आदेश न्यायालयाने दिले आहेत. याप्रकरणी हिंजवडीचे वरिष्ठ पोलिस निरीक्षक यशवंत गवारी यांनी माहिती दिली. त्यांनी सांगितले की, डॉ. राठोड हे आपल्या सहकाऱ्यांसमवेत हिंजवडी गावठाण परिसरात मतदारांना स्लिपा वाटत होते. त्या वेळी सागर साखरे व त्याच्या अन्य साथीदारांनी त्यांना बोलावून शिवीगाळ करून लाथाबुक्‍क्‍यांनी मारहाण केली. त्या वेळी राठोड यांचे अन्य सहकारी पळून गेले. जखमी झालेल्या राठोड यांनी हिंजवडी पोलिसांकडे तक्रार नोंदविली. त्यानुसार सोमवारी (ता. २२) रात्रीच साखरे याला पोलिसांनी ताब्यात घेतले. 

राष्ट्रवादी काँग्रेसच्या मुळशी तालुक्‍याच्या माजी सभापती कोमल साखरे (बुचडे) यांचा सागर हा पती आहे. त्याच्यावर यापूर्वी खंडणीसह हाणामारीचे काही गुन्हे दाखल आहेत, असे गवारी यांनी ‘सकाळ’शी बोलताना सांगितले. दरम्यान, मंगळवारी मतदानाच्या दिवशी हिंजवडीत मोठा पोलिस बंदोबस्त तैनात करण्यात आला होता. सीआरपीएफच्या जवानांनाही पाचारण करण्यात आले होते.'