घोरपडी - वानवडीतील भैरोबा नाल्यावरील जुना पूल मागील आठवड्यात पाडण्यात आला. त्यामुळे वानवडीतून कॅम्पकडे जाणारा रस्ता वाहतुकीसाठी बंद झाला आहे. याला पर्यायी मार्ग म्हणून गंगा सॅटेलाइट सोसायटीशेजारील रस्ता उपलब्ध करून दिला आहे , परंतु त्या रस्त्यावर डांबरीकरण केलेले नाही. तसेच पथदिवे नाहीत त्यामुळे प्रवास करताना नागरिकांचे हाल होत आहेत.

पुणे कॅन्टोमेंट आणि वानवडी परिसराला जोडणारा महत्वाचा पूल होता. साधारण दररोज रोज अडीच ते तीन हजार वाहनांची येथून ये- जा होत असे. पूल तोडल्याने सर्व वाहतूक पर्यायी मार्गवर वळवली आहे. परंतु डांबरीकरण नसल्यामुळे रस्त्यावरील खडी व धुळीमुळे वाहनचालक त्रस्त झाले आहेत. तसेच पथदिवे नसल्यामुळे रात्रीच्या वेळी प्रवास करताना नागरिकांना अंधारातून प्रवास करावा लागत आहे. यामुळे रोज किरकोळ अपघात होत असून प्रशासन गंभीर अपघातांची वाट पाहत आहे का असा प्रश्न निर्माण झाला आहे.

मैथिली मथवडकर, स्थानिक रहिवासी -

मोहल्ला कमिटी मध्ये याबाबत खूप दिवस आधी सांगितले होते, पर्यायी रस्त्याचे काम पूर्ण केल्याशिवाय पूल तोडू नये. परंतु मनपाने काम सुरू केले. जो पर्यायी मार्ग दिला आहे , त्याची स्थिती अतिशय वाईट असून गाडी चालवताना रस्त्यावरील दगड उडतात, ते इतर वाहनचालकांना लागून अपघात होऊ शकतो. डांबरीकरण व पथदिवे आवश्यक असून त्याचे तातडीने काम करावे.

किरण कलशेट्टी, कनिष्ठ अभियंता मनपा -

डांबरीकरण व पथदिवे याबाबत आम्ही मुख्य खात्याकडे मागणी केली असून लवकरच हे पूर्ण होईल.

नागरिकांनी वारंवार तक्रार करूनही रस्त्याचे काम केले जात नाही, त्यामुळे रस्ता रोको आंदोलन करण्याचा इशारा दिला आहे. यामध्ये मोहल्ला कमिटीचे सदस्य, आजूबाजूच्या सोसायटीतील नागरिक आणि वानवडी मधील नागरिक सहभागी होतील असे सांगितले आहे. नागरिकांच्या वतीने मंगळवारी हे आंदोलन करण्यात येणार आहे. तसेच याबाबत अधिकाऱ्यांना निवेदन देण्यात येणार आहे.