आंबेठाण - खेड, शिरूर, दौंडसह पुणे शहराच्या पूर्व भागाला वरदान ठरलेल्या भामा आसखेड (ता. खेड) धरणात आज (दि. २१) ४३.२५ टक्के पाणीसाठा जमा झाला आहे. मागील वर्षीच्या तुलनेत हा साठा निम्म्याने कमी आहे. मागील वर्षी आजच्या तारखेला धरणात ८७.१४ टक्के पाणीसाठा जमा झाला होता.

भामा आसखेड हे खेड तालुक्यातील पश्चिम भागात भामा नदीवर उभारलेले मातीचे धरण आहे. धरणाची पाणी साठवण क्षमता ८.१४ टीएमसी इतकी आहे. चालू वर्षी धरण परिसरात १ जून पासून ३०१ मिमी पावसाची नोंद झाली आहे.

सद्या शिवे, वहागाव, देशमुखवाडी, आंबोली, वांद्रा, कोळीये, आंभु, पाईट, पाळू, वाघू, तोरणे, आहिरे आदी भागात पावसाची संततधार सुरू असल्याने धरणात मोठया प्रमाणात पाणीसाठा जमा होत आहे.

धरणात सध्या एकूण पाणीसाठा हा ३.७९ टीएमसी असून उपयुक्त पाणीसाठा हा ३.३२ टीएमसी इतका आहे.मागील वर्षी आजच्या तारखेला धरणात ८७.१४ टक्के पाणीसाठा जमा झाला होता.

मागील वर्षीपासून धरणातून पुणे शहराच्या पूर्व भागासह तीर्थक्षेत्र आळंदीला पाणी पुरवठा केला जात आहे. तसेच प्रचंड कडक असणाऱ्या उन्हाळ्यात बाष्पीभवन मोठ्या प्रमाणात होत असल्याने पाणीसाठा झपाट्याने कमी झाला होता.त्यामुळे यावर्षी कमी पाणीसाठा शिल्लक राहिला होता.

पुढील काळात पिंपरी चिंचवड शहराला देखील पाणी पुरवठा सुरू झाला तर धरणात पाणीच शिल्लक राहणार नाही अशी चिंता या भागातील शेतकरी व्यक्त करीत आहे.

सध्या धरणाच्या परिसरात पावसाची संततधार सुरू असल्याने येवा मोठया प्रमाणात आहे. त्यामुळे पर्यटकांनी काळजी घ्यावी असे आवाहन सहाय्यक अभियंता (श्रेणी१) अश्विन पवार, शाखा अभियंता निलेश घारे-देशमुख, कालवा निरीक्षक वसंत ढोकरे यांनी केले आहे.