माजी मंत्री, ज्येष्ठ नेते
भीमण्णा खांड्रे यांचे निधन
बंगळूर, ता. १७ : अखिल भारतीय वीरशैव लिंगायत महासभेचे माजी अध्यक्ष आणि वनमंत्री ईश्वर खांड्रे यांचे वडील, माजी मंत्री व ज्येष्ठ राजकीय नेते भीमण्णा खांड्रे (वय १०२) यांचे वृद्धापकाळाने शुक्रवारी रात्री बिदर येथे निधन झाले.
आरोग्य समस्यांमुळे त्यांच्यावर मल्लसी स्पेशालिटी अँड सुपर स्पेशालिटी रुग्णालयात काही दिवस उपचार सुरू होते; मात्र उपचारांना अपेक्षित प्रतिसाद न मिळाल्याने त्यांना घरी आणले होते. शुक्रवारी रात्री त्यांनी अखेरचा श्वास घेतला. पार्थिवाचे अंतिम दर्शन व अंत्यसंस्कार शनिवारी झाले. भालकी येथील गांधी गंजमधील स्वगृहात दुपारपर्यंत अंत्यदर्शनासाठी व्यवस्था केली होती. भीमण्णा खांड्रे यांच्या निधनाबद्दल मुख्यमंत्री सिद्धरामय्या, उपमुख्यमंत्री डी. के. शिवकुमार यांच्यासह अनेक नेते व मान्यवरांनी शोक व्यक्त केला आहे. भीमण्णा खांड्रे यांचा जन्म ८ जानेवारी १९२७ रोजी झाला. त्यांनी भालकी येथील हिरेमठात कन्नड शिक्षण घेतले व शरण तत्त्वज्ञानाची दीक्षा स्वीकारली. बिदरमध्ये माध्यमिक शिक्षण पूर्ण करून हैदराबादच्या उस्मानिया कॉलेजमधून कायद्याचे शिक्षण घेतले. कन्नड, उर्दू, फारसी, मराठी व इंग्रजी भाषांवर त्यांचे प्रभुत्व होते.