भीमाशंकर, ता. ४ ः श्री क्षेत्र भीमाशंकर ते श्री क्षेत्र त्र्यंबकेश्वर संत निवृत्तीनाथ पायी दिंडी पालखी पौष पौर्णिमेला शनिवारी (ता. ३) रात्री ९ वाजता लुमाजी महाराज भारमळ यांची कीर्तनसेवा झाल्यानंतर रविवारी सकाळी ७ वाजता भीमाशंकर मंदिरात वीणेचे पूजन करून पालखी त्र्यंबकेश्वरकडे मार्गस्थ झाल्याची माहिती श्री क्षेत्र भीमाशंकर परिसर वारकरी मंडळाचे उपाध्यक्ष राजू महाराज भारमळ यांनी दिली.
दिंडी सोहळ्याचा वडिलोपार्जित वारसा बाळासाहेब आढारी यांनी पुढे सुरू ठेवला आहे. हा दिंडी सोहळा १७ दिवसांचा आहे. दिंडी मार्ग पूर्णपणे डोंगरदऱ्यातून जात असून पुणे व नगर जिल्ह्याच्या सीमेवरील तोलार खिंड, हरिश्चंद्रगड चढून दिंडी अकोले तालुक्यात प्रवेश करते.
पालखीचा मार्ग भीमाशंकर, कडेवाडी, चिखली, फुलवडे, केळी, उंडेखडक, खिरेश्वर, हरिश्चंद्रगड, गुहिरे, कांचनगाव, घोटी, शेवगा डांग मार्गे पालखी त्र्यंबकेश्वर येथे मंगळवारी (ता. १३) जानेवारीला पोहोचणार असून त्याठिकाणी दोन दिवस भजन, हरिपाठ, कीर्तन आदी कार्यक्रम पार पाडून माघारी येताना रामकुंड नाशिक, वडाळा, सर्वतीर्थ टाकेद, आडसरे, खुबी मार्गे पालखी भीमाशंकर येथे सोमवारी (ता. १९) पोहोचणार आहे.
दिंडी सोहळ्याचे आयोजन श्री क्षेत्र भीमाशंकर परिसर वारकरी मंडळाचे अध्यक्ष दत्ता महाराज दांगट तसेच संचालक मंडळाने केले असून दिंडीमध्ये विणेकरी तुकाराम महाराज जढर, सेवेकरी, प्रवचनकार, कीर्तनकार तसेच भीमाशंकर परिसरातील वारकरी, भाविक या दिंडी सोहळ्यात सहभागी झाले आहेत.