भोसरी : वडमुखवाडीतील अलंकापुरम रस्त्यावरील नानांश्री हॉटेलच्या पाठीमगील मोकळ्या जागेत असलेल्या गोठ्याजवळ डुकरांना मारण्यासाठी असलेल्या कचऱ्यात सापडलेले आपटी बॅाम्ब फोडताना झालेल्या स्फोटात पाच वर्षाच्या चिमुकलीचा जागीच मृत्यू झाला. तर दोन लहान मुले जखमी झाली आहेत. ही घटना शनिवारी (ता. ५) सकाळी साडेअकरा वाजण्याच्या सुमारास घडली.

दिघी पोलिसांनी दिलेल्या माहितीनुसार वडमुखवाडीतील कचऱ्यात सापडलेले डुकरांना मारण्यासाठीचे आपटी बॅाम्ब लहान मुलांनी घेऊन ते फोडण्याचा प्रय्तन केला. यामध्ये आपटी बॅाम्बचा स्फोट होऊन राधा गोकुळ गवळी (वय ५) या मुलीचा जागीच मृत्यू झाला. तर आरती गोकुळ गवळी (वय ४) आणि राजू महेश गवळी (वय ४) हे दोघे जखमी झाले आहेत.

गवळी कुटुंबिय हे मुळचे गुजरातचे आहेत. चरितार्थासाठी हे कुटुंबिय वडमुखवाडी येथे राहण्यास आले आहे. राधा हिचे वडील गोकुळ गवळी हे सकाळी दूध टाकण्यासाठी घराबाहेर पडले होते. तर महिला घरामध्ये काम करत होत्या. लहान मुले-मुली घराबाहेर खेळत असताना त्यांना कचऱ्यामध्ये आपटी बॅाम्ब सापडले. हे बॅाम्ब दगडाने राधा फोडत असताना त्याचा स्फोट झाला. स्फोटाची तीव्रता इतकी होती की स्फोट झाल्यावर राधा या चिमुकलीचा पाय निखळून पडला. पुढील तपास दिघी पोलिस ठाणे करत आहे.