जुन्नर : राज्य शासनाने कृषी क्षेत्रातील उल्लेखनीय कामगिरीबद्दल जुन्नर तालुक्यातील तीन प्रगतशील शेतकऱ्यांना कृषी पुरस्कार जाहीर केले आहेत. गोळेगाव येथील प्रगतिशील शेतकरी जितेंद्र चंद्रकांत बिडवई यांना वसंतराव नाईक कृषीभूषण पुरस्कार (२०१९), पारगाव तर्फे आळे येथील विकास हरिभाऊ चव्हाण यांना सर्वसाधारण गटातून (२०१८) तर ओतूर येथील शांताराम भाऊ वारे यांना आदिवासी गटातून (२०१९) शेतीनिष्ठ पुरस्कार जाहीर करण्यात आला आहे. 

हेही वाचा - कोरोना रोखण्याच्या उपाययोजनांना राज्यातील जिम चालकांचा एकमुखाने पाठिंबा

बिडवई यांना यापूर्वी वसंतराव नाईक शेतीनिष्ठ पुरस्कार प्राप्त झाला आहे.त्यांनी  वीस वर्षांपूर्वी गोळेगावला बळीराजा कृषी मंडळाची स्थापना करून कृषी मेळावे, कृषी प्रदर्शन,शेतकरी अभ्यास दौरा, द्राक्ष महोत्सव, शेतकरी ते ग्राहक थेट भाजीपाला विक्री इत्यादी शेतीविषयक उपक्रम चांगल्या प्रकारे राबविले. याबरोबर शेतकऱ्यांसाठी कीटक नाशकांचा सुरक्षित वापर अभियान राबवून मोफत सुरक्षा किटचे वाटप  केले.  शासनाच्या विविध योजनांचा लाभ अनेक शेतकऱ्यांना मिळवून दिला. डिसेंट फाउंडेशन या सेवाभावी संस्थेच्या माध्यमातून शैक्षणिक, सामाजिक व आरोग्यविषयक उपक्रम ते राबवत आहेत.

बिडवई जुन्नर तालुका द्राक्ष उत्पादक संघाचे अध्यक्ष आहेत. नारायणगाव येथील कृषी विज्ञान केंद्राचे  शास्त्रीय सल्लागार समितीचे सदस्य आहेत. श्री लेण्याद्री गणपती देवस्थान ट्रस्टचे सचिव म्हणून  कार्यरत आहेत. त्यांना मिळालेल्या पुरस्काराबद्दल परिसरातून त्यांचे अभिनंदन होत आहे.

हेही वाचा - पुण्यात मास्कची शिस्त मोडणाऱ्या नागरिकांकडून तब्बल २८ कोटींचा दंड वसूल

(संपादन : सागर डी. शेलार)