पुणे : "महाराष्ट्रात गेल्या वर्षभरात महिलांवरील अन्याय अत्याचाराचे प्रमाण वाढले आहे. महिलांवरील वाढत्या अत्याचाराबाबत राज्य सरकारचे लक्ष वेधण्यासाठी हे आंदोलन करण्यात येत असून, उद्धव सरकार जागे व्हा,' असे आवाहन भारतीय जनता पक्षाचे प्रदेशाध्यक्ष आमदार चंद्रकांत पाटील यांनी केले. 

राज्यात महिलांवरील अत्याचाराविरोधात भारतीय जनता पक्षाच्या वतीने सोमवारी (ता. 12) सकाळी जिल्हाधिकारी कार्यालयासमोर आंदोलन करण्यात आले. भाजपचे खासदार गिरीश बापट, शहराध्यक्ष जगदीश मुळीक, माजी राज्यमंत्री दिलीप कांबळे, नगरसेवक गणेश बीडकर, राजेश येनपुरे, दीपक पोटे, महिला शहराध्यक्ष नगरसेविका अर्चना पाटील, नगरसेविका आरती कोंढरे यांच्यासह भाजपचे अन्य पदाधिकारी-कार्यकर्ते सहभागी झाले होते. 

पुण्याच्या बातम्या वाचण्यासाठी येथे ► क्लिक करा

आमदार पाटील म्हणाले, "गेल्या वर्षभरात राज्यात महिलांवरील अत्याचार मोठ्या प्रमाणावर वाढले आहेत. विशेषत: अल्पवयीन मुली, गतिमंद मुलींवर अत्याचार होत आहेत. महिलांवरील या वाढत्या अत्याचाराबाबत राज्य सरकारचे लक्ष वेधण्यासाठी राज्यात ठिकठिकाणी आंदोलन करण्यात येत आहे.' 

खासदार बापट म्हणाले, "महिला महाराष्ट्रातील, उत्तर प्रदेश किंवा देशातील कोणत्याही राज्यातील असतील तरी महिलांवर अत्याचार होऊ नयेत, ही आपली संस्कृती आहे. महाराष्ट्रातील सत्तारुढ पक्ष ज्या पद्धतीने राजकारण करीत आहे ते लोकांना दिसत आहे. भारतीय जनता पक्ष महिलांच्या पाठीशी भक्‍कमपणे उभे आहे. त्यांच्यावर अन्याय अत्याचार सहन केला जाणार नाही. या सरकारला जाग येणे शक्‍य नाही, कारण हे सरकार झोपलेले आहे. झोपेचे ढोंग घेतलेल्या या सरकारचा पर्दाफाश करण्यासाठी राज्यात सर्वत्र आंदोलन करण्यात येत आहे. महिलांना न्याय न मिळाल्यास आंदोलन तीव्र करण्यात येईल.' 

जगभरातील बातम्या वाचण्यासाठी येथे ► क्लिक करा