पुणे - पुण्यात कोरोनाचा प्रादुर्भाव वाढत चालला असून संसर्ग रोखण्यासाठी कडक निर्बंध लागू करण्यात आल्याची माहिती विभागीय आयुक्त सौरभ राव यांनी दिली. पुढचे सात दिवस पुणे जिल्ह्यात कडक निर्बंध लागू राहतील. याची अंमलबजावणी 2 एप्रिलच्या मध्यरात्रीपासून होणार आहे. दरम्यान, पुण्यात पीएमपी बंद करण्याच्या निर्णयाचा भाजपने विरोध केला आहे. लॉकडाऊन नकोच अशी भूमिका असलेल्या भाजपने आता निर्बंधांमध्ये वाढ केल्यानंतर विरोध दर्शवला आहे. भाजप खासदार गिरीष बापट यांनी संचारबंदी नको तर जमावबंदी लागू करा असं म्हटलं आहे.

पुण्यात संध्याकाळी 6 ते सकाळी 6 या वेळेत पुढील सात दिवस संचारबंदी लागू राहणार आहे. तसंच हॉटेल्स, मॉल, थिएटर्स आणि पीएमपी बससेवा सात दिवसांसाठी बंद ठेवण्यात येणार आहेत. पुण्यात नवे निर्बंध लागू करण्यात आल्यानंतर पुण्याचे खासदार गिरीष बापट यांनी या निर्णयाला विरोध दर्शवला आहे. पीएमपी बंद करू नये असं म्हणत त्यांनी कंपन्यांशी बोलून गाडीची व्यवस्था करण्यात यावी असं म्हटलं आहे. तसंच बाहेर जाणाऱ्या कामगारांना प्राधान्य द्या. वयस्क लोकांना प्राधान्य द्या अशी मागणी त्यांनी केली. संचारबंदी नको तर जमावबंदीचे आदेश द्या अशी मागणी त्यांनी केलीय. बससेवा बंद झाल्यास कामगारांचे हाल होतील असं म्हणत पुण्यातील कडक निर्बंधांना भाजपने विरोध केला आहे. 

पुण्यातील इतर बातम्या वाचण्यासाठी क्लिक करा

काय राहणार बंद 
हॉटेल्स, बार, रेस्टॉरंट
मॉल्स, सिनेमागृह
धार्मिक स्थळे, मंदिर
पीएमपी बस सेवा
संध्याकाळी 6 ते सकाळी 6 या वेळेत संचारबंदी
राजकीय, सामाजिक, धार्मिक कार्यक्रमांवर बंदी
आधीच्या नियमानुसार शाळा, कॉलेज बंदच

काय सुरु?
हॉटेलची पार्सल सेवा 
अत्यावश्यक सेवा
भाजीपाला, फळे, दूध
अंत्यविधीला 20 लोकांची उपस्थिती
लग्न सोहळ्याला 50 जणांची उपस्थिती
​आधी ठरलेल्या लग्नसोहळ्यांनाच परवानगी
दहावी बारावीच्या परीक्षा

हे वाचा - पुणे जिल्ह्यातील कोरोनाचा नीचांकी मृत्यूदर

खासगी कार्यालयांमधून संचारबंदीच्या काळात घरी जाणाऱ्या कर्मचाऱ्यांना संबंधित कंपन्यांनी त्याबाबत पत्र दिले, तर त्यांच्यावर कोणतीही कारवाई होणार नाही. संचारबंदीची कडक अंमलबजावणी केली जाणार माहिती सहपोलिस आयुक्त रवींद्र शिसवे यांनी दिली.