पुणे, ता. ८ ः दृष्टिहीन विद्यार्थी सनथ देशपांडे (९१ टक्के) आणि शौर्य गावळी (७३.८० टक्के) यांनी कोणत्याही लेखकाविना दहावीची बोर्ड परीक्षा देत उत्तम गुण मिळवून उत्तीर्ण झाले. या पद्धतीने उत्तीर्ण होणारे ते यंदाच्या शैक्षणिक वर्षातील पहिले दृष्टिहीन विद्यार्थी ठरले आहेत. निवांत अंध मुक्त विकासालयात उमा बडवे यांच्या ‘स्वलेखन टायपिंग ट्यूटर’च्या माध्यमातून दोघांनी टायपिंगचे प्रशिक्षण घेतले. यापूर्वी दृष्टिहीन विद्यार्थ्यांना परीक्षेसाठी लेखनिकांवर अवलंबून राहावे लागत होते. मात्र, सुलभ तंत्रज्ञानाच्या मदतीने सनथ आणि शौर्य यांनी स्वतः उत्तरे लिहिली. ‘‘दृष्टिहीन विद्यार्थ्यांनाही स्वतंत्रपणे परीक्षा देता यावी, हा आमचा कायम प्रयत्न आहे. त्यांच्या यशामुळे राज्यातील दृष्टिहीन विद्यार्थ्यांसाठी प्रेरणादायी उदाहरण या निमित्ताने निर्माण झाले आहे,’’ असे बडवे यांनी सांगितले.