BOD26A04988
बोधेगाव ः येथील आठवडे बाजारात विक्रीसाठी आलेली जनावरे.

जनावरांना जगवायचे कसे?
शेतकऱ्यांचा सवाल ः चारा छावण्यांची मागणी
उद्धव देशमुख ः सकाळ वृत्तसेवा
बोधेगाव, ता. १४ ः शेवगाव तालुक्याच्या पूर्व भागात यंदा पावसाने ओढ दिल्याने खरीप हंगामातील पिके हातची गेली आहेत. पावसाअभावी विहिरींची पाणीपातळी खालावली असून, हिरव्या चाऱ्याचे उत्पादनही ठप्प झाले आहे. एकीकडे शेतीत केलेला हजारो रुपयांचा खर्च वाया गेला, तर दुसरीकडे जनावरांना जगवायचे कसे, असा प्रश्‍न शेतकऱ्यांसमोर उभा राहिला आहे.
चारा आणि पाण्याच्या टंचाईमुळे शेतकऱ्यांनी गोठ्यातील जनावरांना विक्रीसाठी बाजाराची वाट दाखवण्यास सुरवात केली आहे. बोधेगावसह पूर्व भागातील ४० गावांमध्ये जूनमध्ये अत्यल्प प्रमाणात पाऊस झाला. त्यामुळे खरीप पिकांची उगवण आणि वाढ खुंटली. पेरणीपूर्व मशागत, नांगरणी, पाळी मारणे, बियाणे, खते, फवारणी आणि खुरपणी अशा विविध कामांसाठी शेतकऱ्यांना एकरी १५ ते २० हजार रुपये खर्च करावा लागला. मात्र, पिके हाताशी येण्यापूर्वीच पावसाने दडी मारल्याने पिकांची वाढ खुंटली. काही ठिकाणी पिके सुकली, तर काही ठिकाणी उभी पिके जमीनदोस्त झाली. त्यामुळे शेतकऱ्यांवर आर्थिक संकट कोसळले आहे.
परिसरातील विहिरींची पाणीपातळी खालावल्याने पिण्याच्या पाण्याचा प्रश्‍न गंभीर झाला आहे. पाऊस नसल्याने हिरवा चारा उपलब्ध नाही, तर विकतचा चारा घेणेही शेतकऱ्यांना परवडत नाही. जनावरांना जगवायचे कसे, या विवंचनेतून अनेकांनी आपल्या गोठ्यातील जनावरे विक्रीसाठी बाजारात आणली आहेत. दुष्काळी परिस्थितीमुळे बाजारात जनावरांचे दरही घसरले आहेत. लाखमोलाची जनावरे ५० ते ६० हजार रुपयांपर्यंत विकली जात असल्याचे चित्र आहे.
----------
४० गावांची प्रमुख बाजारपेठ असलेल्या बोधेगाव येथे दरवर्षी उन्हाळ्यात जनावरांच्या चारा-पाण्याचा प्रश्‍न निर्माण होतो. यंदा खरीप हंगाम वाया गेल्याने संकट अधिक गंभीर बनले आहे. शेतकऱ्यांनी उरलेसुरले पशुधनही बाजारात विक्रीसाठी नेण्यापूर्वी शासनाने तातडीने चारा छावण्या सुरू कराव्यात किंवा थेट आर्थिक मदत द्यावी.
-प्रकाश काळे, शेतकरी, बोधेगाव.
----------
पाच हजारांनी दिवाळी गोड
दुष्काळी परिस्थितीत शेतकऱ्यांना दिलासा देण्यासाठी शासनाकडून दिवाळीच्या पार्श्‍वभूमीवर प्रत्येक शेतकऱ्याला पाच हजार रुपयांची मदत देण्यात आली. या मदतीमुळे सणासुदीला काही प्रमाणात हातभार लागला, तरी जनावरांच्या चारा-पाण्याचा प्रश्‍न सुटलेला नाही. जनावरांसाठी तातडीने चारा छावण्या सुरू कराव्यात किंवा डीबीटीच्या माध्यमातून ठरावीक अनुदान थेट पशुपालकांच्या खात्यावर जमा करावे, अशी मागणी शेतकरी करीत आहेत.