किरकटवाडी : पुणे पानशेत रस्त्यावर असलेल्या सोनापूर (ता. हवेली) या गावाजवळ खडकवासला धरणाच्या पाणलोट क्षेत्रात (ता. 5 ऑक्टोबर रोजी) कुजलेल्या अवस्थेत आढळलेल्या अनोळखी मृतदेहाची ओळख पटली असून, नंदकुमार बबनराव पाटील (वय 67, रा.47/31ब,एफ-7, धर्म नगरी सोसायटी, तावरे कॉलनी अरण्येश्वर, पुणे-9.) असे असे मृत व्यक्तीचे नाव आहे. याबाबत हवेली पोलिस ठाण्यामध्ये अकस्मात मृत्यूची नोंद करण्यात आली आहे.

पुणे-लोणावळा लोकल १२ ऑक्टोबरपासून होणार सुरू; प्रवासासाठी लागणार पोलिसांचा पास!

सोनापूर गावचे माजी सरपंच दत्ता पवळे यांनी सोनापूर गावाजवळ खडकवासला धरणाच्या पाण्यामध्ये मृतदेह तरंगत असल्याची माहिती फोनवरून हवेली पोलिस ठाण्याला दिल्यानंतर पोलीस निरीक्षक अशोक शेळके यांच्या मार्गदर्शनाखाली पोलिस हवालदार संजय शेंडगे, चालक महेंद्र चौधरी व होमगार्ड रोहित देशमुख यांनी घटनास्थळी जाऊन मृतदेह पाण्याच्या बाहेर काढला व उत्तरीय तपासणीसाठी ससून रुग्णालयामध्ये पाठवून दिला. 

- पुण्याच्या बातम्या वाचण्यासाठी येथे ► क्लिक करा

दरम्यान पाच ते सहा दिवसांपासून मृत नंदकुमार पाटील हरवले असल्याची फिर्याद नातेवाईकांनी दत्तवाडी पोलिस ठाण्यात दिलेली होती. नातेवाईकांच्या माहितीनुसार मृत नंदकुमार पाटील हे अधूनमधून घरातून निघून जात व काही दिवसांनी घरी परत येत असत. यावेळी पाच ते सहा दिवस झाले तरी पाटील घरी परत न आल्याने नातेवाईकांनी दत्तवाडी पोलिस ठाण्यात धाव घेऊन हरवले असल्याची फिर्याद नोंदवली होती.

- पुण्याच्या बातम्या वाचण्यासाठी येथे ► क्लिक करा

हवेली पोलिस ठाण्याच्या हद्दीत अनोळखी व्यक्तीचा मृतदेह आढळल्याची माहिती पुणे शहर व ग्रामीण पोलिस ठाण्यांना देण्यात आली होती. त्यानुसार दत्तवाडी पोलिसांनी पाटील यांच्या नातेवाईकांना मृतदेहाची ओळख पटविण्यासाठी ससून रुग्णालयात बोलावले होते. नातेवाईकांनी मृतदेह ओळखल्यानंतर कायदेशीर प्रक्रिया पूर्ण करून अंतिम संस्कार करण्यासाठी मृतदेह पाटील यांच्या नातेवाईकांकडे सोपवण्यात आल्याची माहिती हवेली पोलिस स्टेशनचे पोलीस निरीक्षक अशोक शेळके यांनी दिली.

(संपादन : सागर दिलीपराव शेलार)