ब्राह्मणवाड्यात ग्रामस्थांचा रास्तारोको
अकोले, ता. २४ : अवैध दारूविक्रीला आळा घालावा, रस्त्यांची तातडीने दुरुस्ती करावी आणि जलजीवन मिशनच्या कामांची चौकशी करून दोषींवर कारवाई करावी, या मागण्यांसाठी ब्राह्मणवाडा ग्रामस्थांनी आज रास्तारोको आंदोलन केले. त्यानंतर उपोषण सुरू केले.
गावात दारूबंदी असतानाही अवैध दारूविक्री सुरू असल्याचा आरोप ग्रामस्थांनी केला. तसेच राज्य मार्ग क्रमांक २३, ओतूर-ब्राह्मणवाडा आणि कोतूळ-ब्राह्मणवाडा मार्गाची दुरवस्था झाली असून, रखडलेली रस्त्यांची कामे तातडीने पूर्ण करण्याची मागणी करण्यात आली.
जलजीवन मिशनअंतर्गत ब्राह्मणवाडा प्रादेशिक पाणीपुरवठा योजनेचे काम निकृष्ट दर्जाचे असल्याचा आरोपही करण्यात आला. वरिष्ठ अधिकाऱ्यांमार्फत चौकशी करून दोषी ठेकेदार व संबंधित अधिकाऱ्यांवर कारवाई करावी, अशी मागणी ग्रामस्थांनी केली.
उपसरपंच सुभाष गायकर, शिवाजी आरोटे, राज गवांदे, रेश्मा गोडसे, चंद्रकांत गोंदके, हेरंब कुलकर्णी आदींनी आंदोलनाची भूमिका स्पष्ट केली. दरम्यान, काही अधिकारी आंदोलनस्थळी दाखल झाले; मात्र मागण्यांबाबत ठोस लेखी आश्वासन न मिळाल्याने उपोषण सुरूच ठेवण्याचा निर्धार ग्रामस्थांनी केला.