परिंचे - वीर (ता. पुरंदर) धरणातील पाणीसाठा संपुष्टात आला आहे. त्यामुळे धरणामध्ये असलेले ब्रिटिशकालीन धरण उघडे पडले आहे. 

१९२८ मध्ये या धरणाची निर्मिती केली होती. जुन्या धरणाचा बांध, धरणाचे दरवाजे, जुने जॅकवेल, धरणातून डावा व उजवा कालव्याद्वारे करण्यात येणारी पाण्याची वितरण व्यवस्था, धरणावर व कालव्यावर जाण्यासाठीचे साकव पूल, कालव्यातून शेतीला पाणीपुरवठा करण्याची व्यवस्था आदी अवशेष सुस्थितीत पाहायला मिळत आहेत. १९६२ मध्ये या धरणावर नवीन वीर धरण बांधण्याचे काम सुरू करण्यात आले. १९६४ मध्ये हे धरण पूर्ण करून १९६७ धरणातून पहिले आवर्तन कालव्याद्वारे सोडले होते. २०१२ च्या दुष्काळानंतर सात वर्षांनी हे धरण पहिल्यांदा उघडे पडल्याचे शाखा अभियंता धनंजय देशपांडे यांनी सांगितले. 

बुधवारी घेतलेल्या आकडेवारीनुसार ०.३७ टक्के म्हणजे ०.४ टीएमसी पाणीसाठा शिल्लक आहे. धरण पूर्ण मोकळे झाले असून मुख्य नीरा नदी पात्र एवढाच पाणीसाठा शिल्लक आहे.