पुणे : प्रेम प्रकरणातून भावानेच आपल्या बहिणीच्या नवऱ्याचा धारदार शस्त्राने वार करून खून केल्याचा धक्कादायक प्रकार कॅम्प परिसरातील मारझोरियन बेकरी जवळ घडला आहे. ही घटना रात्री साडेआठच्या सुमारास घडली. या घटनेमुळे परिसरात प्रचंड खळबळ उडाली आहे.

मिळालेल्या माहितीनुसार, सुल्तान मैनु सय्यद (रा.लुल्लानगर) असे खून झालेल्या व्यक्तीचे नाव आहे. तर अरबाज कुरैशी असे संशयित आरोपीचे नाव आहे. सुल्तानला उपचारासाठी नजीकच्या रुग्णालयात दाखल करण्यात आले होते, मात्र उपचारापूर्वीच त्याचा मृत्यू झाला.

सुल्तान सय्यद हा नारळ विक्रीचा व्यावसाय करतो. त्याचे आणि आरोपी अरबाजच्या बहिणीचे प्रेमसंबंध होते. त्यांनी काही दिवसापूर्वी प्रेम विवाह देखील केला होता. मात्र हा विवाह अरबाजच्या घरच्यांना मान्य नव्हता. यातून अनेकदा त्यांच्यात वाद देखील झाले होते. मात्र आज अरबाजने रागाच्या भरात साडेआठ वाजता सय्यदवर धारदार शस्त्राने वार केले यामध्ये त्याचा मृत्यू झाला. याबाबत रात्री उशीरापर्यंत लष्कर पोलिस ठाण्यात गुन्हा दाखल करण्याचे काम सुरू होते.