पुणे - मार्केटयार्ड येथील पुणे कृषी उत्पन्न बाजार समितीच्या किराणा भुसार मालाच्या बाजारात दुरुस्तीच्या नावाखाली पूर्ण बांधकाम करण्याचे प्रकार सुरूच आहेत. 

किराणा भुसार मालाच्या बाजारातील गाळ्यांचे बांधकाम हा नेहमीच चर्चेचा विषय राहिला आहे. साइड पट्ट्यांमधील बांधकामे, दुकानापुढील ओटे असे मुद्दे वादग्रस्त ठरले आहेत. गोदामाची जागा अपुरी पडत असल्याने साइड मार्जिनमध्ये बांधकाम करून जागा उपलब्ध करून घेतली आहे. हे बांधकाम अधिकृत करून घेण्यासाठी व्यापाऱ्यांनी यापूर्वी प्रयत्न केले आहे. अद्याप हा विषय मार्गी लागलेला नाही. आता गेल्या तीन- चार वर्षांत दुरुस्तीच्या नावाखाली पूर्ण बांधकाम करण्याचे प्रकार वाढले आहेत. बाजार समिती संबंधित गाळेधारकांना केवळ बांधकाम दुरुस्तीची परवानगी देते. आधीचे बांधकाम पाडून, त्या ठिकाणी नव्याने बांधकाम करावयाचे असल्यास पुणे महापालिकेच्या बांधकाम विभागाची परवानगी घ्यावी लागते. दुरुस्तीसाठी बाजार समितीकडे अर्ज केल्यानंतर पूर्ण बांधकाम केले जात आहे. किरकोळ दुरुस्तीच्या नावाखाली अतिरिक्त बांधकाम केले जात असल्याकडे प्रशासनाचे दुर्लक्ष होत आहे. याबाबत बाजार समितीचे प्रशासक बी. जे. देशमुख म्हणाले, ‘‘संबंधित बांधकामाची पाहणी केली जाईल. परवानगी आहे की नाही याची पडताळणी करून कार्यवाही केली जाईल.’’