कात्रज (पुणे) : कात्रज घाटात वणवा लागल्याची घटना मंगळवारी (ता. १६) घडली. ही आग भिलारेवाडी ग्रामपंचायतीच्या हद्दीत वनक्षेत्रालगत असणाऱ्या खाजगी मालकी क्षेत्रात लागली होती. घटनेची माहिती मिळताच अग्निशमन दलाच्या दोन गाड्यांसह वन विभागाचे कर्मचारी घटनास्थळी पोहोचले. दोन तासाच्या अथक प्रयत्नानंतर आगीवर नियंत्रण मिळवण्यात यश आले आहे, अशी माहिती कात्रज विभागाच्या वनरक्षक स्वाती खेडकर यांनी दिली आहे.

- पुणे सायबर पोलिसांची मोठी कारवाई; भारतीयांचे वाचविले तब्बल सव्वा दोनशे कोटी रुपये!​

साधारणतः ४ ते ५ एकर क्षेत्रात ही आग लागली होती. या आगीमध्ये कुठलेही नुकसान झालेले नाही. अग्निशामक दलाच्या गाड्या डोंगराच्या पायथ्याशी थांबवण्यात आल्या होत्या. त्यानंतर अग्निशामक दलाच्या आणि वन विभागाच्या कर्मचाऱ्यांनी घटनास्थळी जात आगीवर नियंत्रण मिळवण्यासाठीचे प्रयत्न सुरू केले. आग कशामुळे लागली, याचे कारण मात्र अद्याप स्पष्ट झालेले नाही. 

- संत तुकाराम महाराज बीज सोहळा होणार की नाही; जिल्हाधिकाऱ्यांनी दिले आदेश​

दरम्यान, कात्रज घाटात आग लागण्याची ही दुसरी घटना आहे. काही दिवसांपूर्वीच कात्रज घाटात शिंदेवाडी ग्रामपंचायत हद्दीत आग लागली होती. शिंदेवाडीच्या अगोदर 'हॉटेल चुल मटण' रस्त्यासमोर चार-पाच किलोमीटरपर्यंत डोंगराला आग लागली होती. या आगीत डोंगरावर असणारे लहान-मोठे प्राणी, पक्षी हे नष्ट झाल्याची शक्यता वर्तिविण्यात आली होती. कात्रज घाटातील डोंगरावर अशा प्रकारच्या आगीच्या घटना घडत असल्याने आता पर्यावरण प्रेमींकडून चिंता व्यक्त होत आहे.

- पुणे शहर आणि जिल्ह्यातील बातम्या वाचण्यासाठी येथे ► क्लिक करा

(Edited by: Ashish N. Kadam)