पुणे : कोरोना प्रतिबंधक लशीचे कोणाला किती डोस दिले, त्याचा हिशेब सार्वजनिक आरोग्य खात्याने शुक्रवारी महापालिकेला मागितला. तसेच, प्रत्येक केंद्रावर किमान पाच दिवसांच्या डोसचा साठा शिल्लक राहील, या प्रमाणात लशीचे वितरण करा, असा सल्लाही दिला. ‘कोरोना प्रतिबंधक लस शिल्लक नाही. राज्याकडून लशीचा पुरवठा झालेला नाही. आता डोस द्यायचे कसे,’ असा गंभीर प्रश्न पुण्यात निर्माण झाला होता. पुण्यात लशीची मागणी वाढत आहे, पण मागणीप्रमाणे पुरवठा होत नाही, असे आरोपही होऊ लागले आहेत. पिंपरी-चिंचवड महापालिकेकडून उधार-उसनवारी करून पुण्यातील लसीकरण सुरू असल्याचे चित्र निर्माण झाले आहे. या पार्श्वभूमीवर पुणे महापालिकेला सार्वाजनिक आरोग्य खात्याने लशीचा हिशेब शुक्रवारी विचारला.

- महापालिकेत 78 हजार डोस
कोरोना प्रतिबंधक लशीचे 78 हजार डोस महापालिकेत आहेत. पण, ते वेगवेगळ्या केंद्रांवर वितरित झाले आहेत. पुण्यात दररोज 12 ते 15 हजार जणांचे लसीकरण होते, या हिशेबाने पुढील किमान पाच दिवस पुरेल इतके डोस पुण्यात असल्याचे आरोग्य खात्याने महापालिकेला स्पष्ट केले.

- ताज्या बातम्यांसाठी डाऊनलोड करा ई-सकाळचे ऍप

- प्रत्येक डोसची माहिती
- इ-व्हिन (इलेक्ट्रॉनिक व्हॅक्सिन इंटेलिजन्स नेटवर्क)मध्ये देशभरातील प्रत्येक लशीच्या डोसचा हिशेब दिसतो.
- महापालिकेला किती डोस दिले, याची संपूर्ण माहिती आरोग्य खात्याकडे आहे. प्रत्येक केंद्रनिहाय दररोज किती जणांना डोस दिले त्याची माहिती महापालिकेनेच दिली आहे. त्यामुळे उरलेले डोस त्यांच्याकडेच असणार. यात लसीकरणात वाया जाणाऱ्या दहा टक्के डोसचाही विचार केला आहे.
कुठे आहेत लस?
1. काही मोठ्या रुग्णालयांनी एकदम लशीचे पैसे भरले आहेत. महापालिकेने त्यांना एकाच वेळी सगळे डोस दिले. त्यामुळे या रुग्णालयांकडे डोसचा साठा दिसतो.
2. महापालिकेच्या काही रुग्णालयांमध्येही मोठ्या प्रमाणात लसीकरण होते. तेथेही लशीचा मोठा पुरवठा करण्यात आला.

- पुण्याच्या बातम्या वाचण्यासाठी येथे ► क्लिक करा
 

सुचवलेला उपाय
- पुण्यात गेल्या दहा दिवसांमध्ये एकेका केंद्रांमधून किती लसीकरण झाले, याची सरासरी काढा.
- त्यानुसार पुढील दहा दिवस पुरेल इतक्या डोसचा पुरवठा त्या केंद्राला करा.
- त्यामुळे पाच ते दहा दिवस पुरेल इतका साठा केंद्रांकडे राहील.