कॅनडातील गहू उत्पादनात १३ टक्के घट अपेक्षित
--
‘यूएसडीए’चा अंदाज; उत्पादन ३.४६ कोटी टनांवर येण्याचा अंदाज
--

ओटावा (वृत्तसंस्था) : प्रतिकूल हवामानामुळे २०२६-२७ या विपणन वर्षात (ऑगस्ट-जुलै) कॅनडातील गहू उत्पादनात घट होण्याची शक्यता आहे. अमेरिकेच्या कृषी विभागाच्या (यूएसडीए) अंदाजानुसार, कॅनडाचे गहू उत्पादन ३.४६ कोटी टन राहण्याची शक्यता आहे. मागील वर्षाच्या तुलनेत हे उत्पादन सुमारे १३ टक्क्यांनी कमी असेल. उत्पादनातील या घटीचा जागतिक गहू व्यापारावरही परिणाम होण्याची शक्यता आहे.

पेरणी क्षेत्रातील घट आणि सरासरी उत्पादकता कमी राहण्याची शक्यता ही उत्पादन घटीमागील प्रमुख कारणे आहेत. कॅनडातील प्रमुख गहू उत्पादक प्रेअरी प्रांतांमध्ये अतिवृष्टी आणि दीर्घकाळ टिकलेल्या थंडीमुळे पेरणीला विलंब झाला. साधारणपणे मेअखेरीस पूर्ण होणारी पेरणी यंदा लांबली. त्यामुळे पिकाला दव आणि हंगामाच्या सुरुवातीलाच थंडीचा सामना करावा लागण्याचा धोका वाढल्याचे ‘यूएसडीए’च्या अहवालात म्हटले आहे.

२०२५-२६ या विपणन वर्षात कॅनडाची गहू निर्यात २.९९ कोटी टन राहण्याचा अंदाज आहे. मात्र २०२६-२७ मध्ये उत्पादन घटल्यास निर्यातीवरही परिणाम होण्याची शक्यता अहवालात व्यक्त करण्यात आली आहे.

कॅनडाच्या गव्हाच्या प्रमुख आयातदारांमध्ये इंडोनेशिया आणि चीनचा समावेश आहे. २०२५-२६ मध्ये कॅनडाच्या एकूण गहू निर्यातीमध्ये इंडोनेशियाचा वाटा १०.८७ टक्के, तर चीनचा वाटा १०.४१ टक्के होता.
--
चौकट
दबाव वाढण्याची शक्यता
कृषी निविष्ठांच्या वाढत्या खर्चाकडेही अहवालात लक्ष वेधण्यात आले आहे. विशेषतः फॉस्फेट खतांच्या पुरवठ्यातील अनिश्‍चितता आणि वाढत्या खर्चामुळे कॅनडातील गहू उत्पादकांवरील दबाव वाढण्याची शक्यता आहे.