पुणे - पुणे विमानतळावरील आंतरराष्ट्रीय कार्गोसेवा (मालवाहतूक) पुन्हा सुरू झाली. मंगळवारी (ता. १२) पुण्याहून सिंगापूरला १२३ किलो वजनाचे कार्गो पाठविण्यात आले.

प्रवासी वाहतूक करणाऱ्या विमानात कार्गोसाठी जागा नसल्याचे सांगून हवाई वाहतूक करणाऱ्या कंपन्यांनी कार्गोच्या वाहतुकीस नकार दिला. एक महिन्यापासून पुणे विमानतळावरची आंतरराष्ट्रीय कार्गो सेवा बंद होती.

‘महिनाभरातच कार्गोसेवा ठप्प’ अशा आशयाचे वृत्त ‘सकाळ’मध्ये प्रसिद्ध झाले. त्यानंतर सीमाशुल्क विभागाचे आयुक्त यशोधन वनगे यांनी सोमवारी (ता. ११) विमानतळावरील कार्गो टर्मिनलला भेट दिली. प्रशासनाबरोबर चर्चा करून मंगळवारी (ता. १२) कार्गोसेवा पुन्हा सुरू झाली.

यावेळी विमानतळ संचालक संतोष ढोके यांच्यासह अन्य वरिष्ठ अधिकारी उपस्थित होते. उपसरव्यवस्थापक (कार्गो) प्रदीप कुमार म्हणाले, ‘‘काही तांत्रिक अडचणींमुळे सेवा बंद होती. मंगळवारपासून पुन्हा सुरू झाली.’