नारायणगाव, ता. २१ : येथील कृषी विज्ञान केंद्राच्या(केव्हीके) वतीने गाजर गवत निर्मूलन सप्ताह सुरू आहे. यावेळी केव्हीकेच्या शास्त्रज्ञांनी शेतकऱ्यांना गाजर गवताचे यांत्रिक, जैविक व आवश्यकतेनुसार रासायनिक नियंत्रण कसे करता येईल, याबाबत मार्गदर्शन केले.
हा सप्ताह रविवार (ता. १६) ते शनिवारदरम्यान (ता. २२) सुरू असून त्याचा प्रारंभ कांदळी वडामाथा (ता. जुन्नर) येथे करण्यात आला. गाजर गवत मुक्त परिसर - निरोगी पर्यावरण आणि सुरक्षित शेती” हा संदेश यावेळी देण्यात आला. कृषी विज्ञान केंद्राचे शास्त्रज्ञ डॉ. राहुल घाडगे म्हणाले की, ‘‘गाजर गवत हे अत्यंत आक्रमक तण आहे. यामुळे पिकांशी अन्नद्रव्ये, पाणी व जागेसाठी स्पर्धा निर्माण होऊन पिकांच्या उत्पादनावर विपरीत परिणाम होतो. त्याच्या परागकणांमुळे मानवांमध्ये त्वचेची आग, खाज आणि श्वसनासंबंधी त्रास होऊ शकतो.
तसेच, कार्यक्रमात डॉ. दत्तात्रेय गावडे, प्रक्षेत्र व्यवस्थापक वैभव शिंदे यांनीही मार्गदर्शन केले. याप्रसंगी दीपक गोपाळे, जालिंदर घाडगे, तानाजी रेपाळे, गोविंद गोपाळे, नामदेव गोपाळे, गणेश घाडगे, सचिन घाडगे आदी उपस्थित होते.