पुण्यातून एक धक्कादायक घटना समोर आली आहे. पुण्यात चप्पल चोरल्याच्या प्रकरणात तीन जणांविरोधात चोरीचा गुन्हा दाखल करण्यात आला आहे. पुण्यातील खडकी भागातील एका दुकानातून तब्बल ५५ चप्पल आणि बूट जोड चोरट्यांनी चोरून नेल्याची घटना उघडकीस आली आहे. तीन जणांनी मिळून तब्बल ३० ते ४० हजार रुपयांचे ५५ चप्पलांचे जोड लंपास केले आहेत. यातील ४० मेन्स शूज तर १५ लेडीज चपला चोरट्यांनी चोरल्या आहेत.

हरेश आहुजा यांनी या प्रकरणात पोलिसात फिर्याद दिली होती. या चोरीचा तपास करताना पोलिसांनी सागर चांदणे, आकाश कपूर, अरबाज शेख यांना अटक केली आहे.

पोलिसांनी दिलेल्या माहितीनुसार, आहूजा यांचे खडकी बाजार भागात चपलेचे गोडाऊन आहे. शनिवारी गोडाऊन बंद केल्यानंतर रात्री या तीन तरुणांनी गोडाऊनचे शटर उचकटून आत प्रवेश केला आणि हाताला दिसेल आणि मिळतील तसे बूट आणि चप्पल असे एकूण 55 चप्पल आणि बूट चोरी करून पसार झाले.

अशिक्षित असल्यामुळे या तरुणांनी उदरनिर्वाह तसेच दारू पिण्यासाठी ही चोरी केल्याचं प्राथमिक तपासातून निष्पन्न झाले आहे. खडकी पोलिस ठाण्यात या तिघांवर गुन्हा दाखल करण्यात आला आहे.

हि घटना सीसीटीव्हीमध्ये कैद झाली आहे. आपल्या दुकानात चोरी झाल्याचे अहुजा यांच्या लक्षात येताच त्यांनी खडकी पोलीस ठाण्यात तक्रार दाखल केली. अहुजा यांच्या तक्रारीवरून पोलिसांनी आरोपींविरोधात गुन्हा दाखल केला. सीसीटीव्ही फुटेजच्या मदतीने तपास सुरू केला.