चाकण औद्योगिक वसाहत दरवर्षी राज्याला आणि देशाला एक लाख ते सव्वा लाख कोटी रुपयांचा महसूल मिळवून देते. आज या वसाहतीची स्थिती वेदनादायी बनली आहे. रस्ते, पाणी, वीज, स्वच्छता, कायदा-सुव्यवस्था आणि आरोग्य अशा अत्यावश्यक बाबींकडे शासन व प्रशासनाने दुर्लक्ष केले. त्यामुळे ही सुवर्णनगरी संकटात सापडली आहे. एवढी मोठी आर्थिक ताकद असतानाही कोणताही राजकीय आरोप न करता हे नमूद करावेसे वाटते की, कोणत्याही शासनाने या औद्योगिक वसाहतीच्या दैनंदिन व्यवस्थेकडे लक्ष दिले नाही. वाहतूक व्यवस्था, रस्ते, उपरस्ते, नियमित पाणीपुरवठा, वीज, घनकचरा व्यवस्थापन, पर्यावरण, नागरी सुविधा, आरोग्य, शिक्षण आणि सार्वजनिक वाहतूक व्यवस्था या सर्व अत्यावश्यक बाबींकडे कोणतेही नियोजन केले गेले नाही. तसे प्रयत्नही झाले नाहीत. थोडक्यात सांगायचे तर वसाहत स्थापन झाल्यापासून जी परिस्थिती होती, तिच्यात कोणतीही ठोस सुधारणा झालेली नाही.
- ॲड. राम जनार्दन कांडगे, माजी आमदार, चाकण
-----