पुणे - चांदणी चौक येथील रस्तारुंदीकरण आणि उड्डाण पुलासाठीचे भूसंपादन लवकर पूर्ण करावे आणि तातडीने कामाला सुरवात करावी, अशी सूचना पालकमंत्री गिरीश बापट यांनी मंगळवारी पुणे महानगरपालिकेला दिल्या. 

जिल्ह्यातील विविध प्रलंबित विकासकामांचा आढावा व्हिडिओ कॉन्फरसिंगद्वारे पालकमंत्री बापट आणि मुख्यमंत्री कार्यालयाचे अपर मुख्य सचिव प्रवीण परदेशी यांनी घेतला. या वेळी जिल्हाधिकारी नवल किशोर राम यांच्यासह महानगरपालिका व पीएमआरडीएचे अधिकारी उपस्थित होते. या बैठकीत चांदणी चौक उड्डाण पूल, पुरंदर विमानतळ, पीएमआरडीएला अर्धा टीएमसी पाणी देण्यासंदर्भात, भामा आसखेड, मेट्रो आदी विषयांचा आढावा घेण्यात आला.

या वेळी चांदणी चौक येथील रस्ता रुंदीकरणासाठी भूसंपादनाचे काम सुरू करण्यात आले. भूसंपादनासाठी सुमारे ६०० नागरिकांना नोटिसा बजावण्यात आल्या आहेत. ३१ ऑक्‍टोबरपर्यंत भूसंपादनाचे काम पूर्ण करून प्रत्यक्ष कामाला सुरवात करण्यात येणार असल्याची माहिती पालिका प्रशासनाकडून देण्यात आली. 

भामा-आसखेड प्रकल्पग्रस्तांच्या मागण्यांवर या वेळी चर्चा करण्यात आली. या प्रकल्पग्रस्तांनी जमिनीच्या बदल्यात जमिनीची मागणी करण्यात आली आहे. जमिनीच्या बदल्यात जमीन देणे शक्‍य नसेल, तर रोख स्वरूपात मोबदला देण्यात यावा; तसेच यासाठी पुणे आणि पिंपरी पालिकांनी पैसे द्यावे, अशी सूचना बापट यांनी या वेळी दिल्या.

पाणीप्रश्‍नाबाबत आज बैठक
पुणे महानगर प्रदेश विकास प्राधिकरणाच्या हद्दीतील नागरिकांना खडकवासला प्रकल्पातून पाणी देण्याची मागणी होत आहे. पीएमआरडीएकडून अर्धा टीएमसी पाण्याची मागणी जलसंपदा विभागाकडे करण्यात आली आहे. यावर निर्णय घेण्यासाठी उद्या (ता. २६) मुंबई येथे जलसंपदामंत्री गिरीश महाजन यांच्याकडे बैठक होणार असल्याची माहिती या वेळी देण्यात आली.