पुणे : 'मी पुण्याचाच', 'कोथरूडचे गल्लीबोळ माझ्या इतके कोणालाही माहीत नाही' असे म्हणत मतदारांची समजूत घालण्यासाठी भावनिक साद घालणारे पालकमंत्री चंद्रकांत पाटील यांना नेटिझन्सनी चांगलेच ट्रोल केले आहे.

कोथरूमधून उमेदवारी जाहीर झाल्यावर पाटील यांना पक्षातून तसेच मतदारांकडून ही नाराजीचा सामना करावा लागत असल्याचे ट्विटरवरून दिसत आहे. मतदारांची नाराजी दूर करण्यासाठी पाटील सोशल मीडियावर प्रयत्न करीत असले तरी ते त्यांच्या अंगलट येत आहेत. ट्विटरवर त्यांना 'भोकरदनवरून का नाही उभे राहत', 'पालकमंत्री म्हणून काय काम केले ते आधी सांगा', 'तुमचा आणि पुण्याचा काय संबंध', 'कोल्हापूरला परत जा' अशा अनेक सूचना, सल्ले त्यांना नेटकरी देत आहेत. पाटील यांच्याबद्दलचा राग विविध प्रकारे त्यातून व्यक्त होताना दिसत आहे.