पुणे - एसटीने (ST) औरंगाबादहून पुण्याकडे निघालो होतो. अहमदनगरला आल्यावर ‘नाथजल’ पाण्याच्या बाटलीसाठी (Water Bottle) २० रुपये मागितले, तिच्यावर छापील किंमत १५ रुपये आहे, तरीही २० रुपये कसे मागता आहात, असा प्रश्न विक्रेत्याला केला असता, त्याने हातातली बाटली हिसकावून घेतली. ‘१५ रुपयांना नाही, २० रुपयाला घ्यायची असेल, तर घे नाहीतर नको घेऊस.’ असे उद्धटपणे उत्तर दिल्याचे प्रवासी विवेक जाधव यांनी सांगितले.

पुणे, वाकडेवाडी (शिवाजीनगर), स्वारगेट या एसटी स्थानकांवर एसटी महामंडळाच्या उपक्रमांपैकी एक असलेल्या ‘नाथजल’ची विक्री छापील किमतीपेक्षा पाच रुपये आगाऊ घेऊन केली जाते. याची माहिती समोर आली, त्यावर ‘सकाळ’ने ‘नाथजल बाटली’तून पाण्यासारखा पैसा! या मथळ्याखाली वृत्त प्रकाशित केले होते. त्यावर प्रवाशांनी अनुभव व्यक्त केले.

खाद्यपदार्थांची विक्रीही अधिक किमतीने होते. गंगाखेडच्या एसटी स्थानकातील स्टॉलवरून बिस्कीटपुडा विकत घेतला असता, विक्रेत्याने छापील किमतीपेक्षा अधिक किंमत सांगितली. त्याला जास्त पैसे का? असे विचारले असता, ‘‘आम्हाला एसटी स्थानकातील गाळा भाड्याने घेण्यासाठी जास्त पैसे देऊन निविदा भरावी लागते, म्हणून हे पैसे आम्ही ग्राहकांकडून अशा प्रकारे वसूल करतो.’ असे उत्तर दिले.

प्रवासी म्हणतात...

• कुठल्याच स्थानकावर या बाटलीची किंमत १५ रुपये आहे, अशी जाहिरात नाही

• तक्रार केल्यास विक्रेते अंगावर धावून येतात

• परिवहनमंत्र्यांनी उच्चस्तरीय चौकशी करून दोषींवर कारवाई करावी

• पाण्याची बाटलीची किंमत मोठ्या अक्षरांत लिहून फलक जागोजागी लावावेत