मंद्रूप तहसील कार्यालयांतर्गत
महाराजस्व समाधान शिबिर
सकाळ वृत्तसेवा
मंद्रूप, ता. ३ : अपर तहसील कार्यालय, मंद्रूपच्या वतीने सामान्य नागरिक व शेतकऱ्यांचे महसूल विभागाशी संबंधित प्रलंबित प्रश्न तातडीने निकाली काढण्यासाठी ‘छत्रपती शिवाजी महाराज महसूल समाधान शिबिर अभियान - टप्पा १’ राबविण्यात येत आहे. या अभियानाचा प्रारंभ मार्च महिन्यापासून झाला आहे.
महसूल व वनविभागाच्या १८ फेब्रुवारीच्या शासन निर्णयानुसार हे अभियान राबविले जात असून, नागरिकांना ‘सिंगल डे सर्व्हिस डिलिव्हरी’च्या माध्यमातून एकाच दिवशी विविध सेवा उपलब्ध करून देणे व डिजिटल सेवांचा प्रभावी वापर सुनिश्चित करणे, हा या उपक्रमाचा मुख्य उद्देश आहे.
नियोजित वेळापत्रकानुसार ७ मार्च रोजी माळकवठे (निंबर्गी मंडल), १४ मार्च - मंद्रूप (मंद्रूप मंडल), १० एप्रिल - औराद (औराद मंडल), १७ एप्रिल - विंचूर (विंचूर मंडल), ८ मे - निंबर्गी (निंबर्गी मंडल), १५ मे - टाकळी (मंद्रूप मंडल) अशी सर्व शिबिरे सकाळी १० वाजता सुरू होतील.
या शिबिरांमध्ये प्रलंबित फेरफार प्रकरणे, ७/१२ उताऱ्यातील चुका दुरुस्ती, डिजिटल स्वाक्षरीयुक्त ७/१२ व ८-अ उतारा वितरण, उत्पन्न, रहिवास, जात व नॉन-क्रिमीलेअर प्रमाणपत्रे, अकृषिक परवानगी व मार्गदर्शन, नव्या व्यवस्थेनुसार सनद वाटप, तुकडेबंदी कायद्यांतर्गत प्रकरणांचा निपटारा, पाणंद रस्त्यांची माहिती, सामाजिक अर्थसाहाय्य योजनांचे लाभ, विद्यार्थ्यांसाठी विविध दाखले, घरकुलासाठी पट्टे वाटप, ई-मोजणी अर्ज, ॲग्रीस्टॅक व पीएम किसान नोंदणी आदी सेवा एकाच ठिकाणी उपलब्ध करून दिल्या जाणार आहेत.
या संधीचा लाभ कार्यक्षेत्रातील जास्तीत जास्त नागरिकांनी घ्यावा, असे आवाहन अपर तहसीलदार विष्णू बुटे यांनी केले आहे.