पिंपरी - चिंचवड येथील जिजाऊ उद्यान परिसरात शनिवारी, रविवारी रस्त्याच्या दुतर्फा वाहने लावली जातात त्यामुळे कोंडी होते. यासंदर्भात महापालिका प्रशासनाने कायमस्वरूपी उपाययोजना करावी, अशी नागरिकांची मागणी आहे.

स्थानिक नागरिकांच्या अंदाजानुसार दर शनिवार, रविवार सुमारे दीड ते दोन हजार नागरिक उद्यानात येतात. उद्यानालगत महापालिकेने दुचाकी पार्किंगसाठी सुविधा केली आहे. मात्र, मोटारींच्या पार्किंगसाठी कोणतीही सुविधा नाही. त्यामुळे येथे येणाऱ्या नागरिकांना त्यांच्या मोटारी रस्त्याच्या कडेलाच उभ्या कराव्या लागतात. त्यातच आजूबाजूच्या इमारतींमधील अनेक नागरिकही त्यांच्या मोटारी रस्त्यावर उभ्या करतात.

उद्यानात येणाऱ्यांची संख्या जास्त असल्याने दुचाकी पार्किंगची जागाही खूपच अपुरी पडते. त्यामुळे मोटारींबरोबरच दुचाकीही रस्त्याच्या कडेलाच लावाव्या लागतात.

तसेच उद्यानाच्या बाहेर घोडे व्यावसायिक उभे असतात. सर्वांचा परिणाम वाहतूक कोंडीत होतो. 

उद्यानात फिरायला आलेले अनिल भोसले म्हणाले, ‘‘महापालिकेने मोटारींच्या पार्किंगसाठी व्यवस्था करावी. वाहनांच्या वाढत्या संख्येमुळे उद्यानात ये-जा करण्यासाठी रस्ता ओलांडताना ज्येष्ठ नागरिकांची गैरसोय होते. त्यामुळे वाहतूक सुरळीत करण्यासाठी या परिसरात सायंकाळी कर्मचाऱ्याची नियुक्ती करावी.’’यासंदर्भात महापालिकेच्या अतिक्रमण निर्मूलन विभागाचे कार्यकारी अभियंता राजेंद्र राणे म्हणाले, ‘‘यासंदर्भात संबंधित कर्मचाऱ्याला कोंडीची माहिती देऊन योग्य ती कारवाई करण्यास सांगतो.’’