पुणे - ‘‘आपले नगर नियोजनाकडे दुर्लक्ष झाल्याने शहरे बकाल झाली आहेत. त्यांची वाढ आडवी-तिडवी होत आहे. त्यामुळे भविष्यात शहरांचा विकास पर्यावरण पूरक आणि शाश्‍वत व्हायला हवा,’’ अशी कबुली मुख्यमंत्री व नगरविकासमंत्री देवेंद्र फडणवीस यांनी आज दिली.

ते म्हणाले, ‘‘नगर रचनाकार हा केवळ एक इमारत बांधत नाही किंवा शहर उभे करीत नाही, तर तो राष्ट्र उभे करतो. जागतिक तापमानवाढीचा धोका मोठा आहे. जगाचे तापमान दोन डिग्रीने वाढले, तर त्याचे अनेक दुष्परिणाम पुढच्या पिढीला सोसावे लागतील.’’ तंत्रज्ञान क्षेत्रात रोज क्रांती होत आहे. बदलणारे तंत्रज्ञान आणि ते आत्मसात करणे हे फार मोठे आव्हान आहे. यापुढील काळात पैसा नाही तर माहिती हाच पैसा ठरणार आहे. देशाचा आर्थिक विकासाचा दर वाढत असून यातून निर्माण होणाऱ्या रोजगाराच्या संधीचा आपण लाभ घेतला पाहिजे.’’

सतीश मिसाळ एज्युकेशन फाउंडेशनच्या ‘ब्रिक ग्रुप ऑफ इन्स्टिट्यूट’च्या पहिल्या पदवी प्रदान समारंभात ते बोलत होते. महापौर मुक्ता टिळक, ग्रामविकासमंत्री पंकजा मुंडे, सावित्रीबाई फुले पुणे विद्यापीठाचे कुलगुरू डॉ. नितीन करमळकर, संचालिका आमदार माधुरी मिसाळ, दीपक मिसाळ, पूजा मिसाळ आदी उपस्थित होते. वास्तुशास्त्र शाखेतील सर्वोत्कृष्ट ठरलेला इशान केसकर, चैत्राली देशपांडे, जगदीश सुतार, अद्वैत जाधव, श्रद्धा धुपाटणे, संजना जदोन, हर्शल मुथा, सिमरन शहा, पीयूष गोठी आदींना गौरविण्यात आले.