पुणे ः बाणेर येथील प्रथमेश पार्क येथे मुळा नदीच्या पुरामुळे तसेच जवळील ओढ्याचे पाणी या ठिकाणी शिरल्याने परिसरातील नागरिकांवर मोठे संकट कोसळले आहे. नागरिकांचे जनजीवन पूर्णपणे विस्कळित झाले असून, अनेक समस्यांना त्यांना सामोरे जावे लागत आहे. 

रविवार सकाळपासून या ठिकाणी पाणी शिरायला सुरवात झाली. या पातळीत सतत वाढच होत असल्याने संपूर्ण सोसायटीला जलाशयाचे रूप प्राप्त झाले आहे. आज पाणी जास्तच प्रमाणात आल्याने सोसायटीच्या प्रवेशद्वाराला पाणी लागले आहे. सध्या या ठिकाणी महापालिकेचे अधिकारी, कर्मचारी, पोलिस, आपत्कालीन जीवरक्षक पथक परिसरात मदत कार्य करीत आहेत. सकाळपासून चाळीस कुटुंबांना सुरक्षितरीत्या बाहेर काढले असून अजूनही हे काम सुरूच आहे. काही नागरिक कितीही विनवण्या केल्या तरी घर सोडून दुसरीकडे राहायला जायला तयार नाहीत. या ठिकाणी बोटीमधून नागरिकांना बाहेर काढले जात आहे. 

आपत्कालीन जीवरक्षक पथक योग्य वेळी आमच्या मदतीला धावून आल्याने आम्ही सुखरूप बाहेर पडू शकलो. आम्ही प्रशासनाचे आभार मानत असल्याचे प्रथमेश पार्कचे रहिवासी संजय ताम्हाणे यांनी सांगितले.